BAUKAU, 26 Maiu 2025 (TATOLI) —Autoridade Administrasaun Postu Administrativu Baguia, Munisípiu Baukau, hein prezensa Sekretariadu Téknika Administrasaun Eleitorál (STAE) hodi halo atendimentu kartaun eleitorál biométriku iha baze.
Administradór Postu Administrativu Baguia, Mário Xavier da Silva, konsidera kartaun eleitorál nu’udár dokumentu importante maibé fatór distánsia no kondisaun estrada implika sidadaun barak iha postu referidu liuliu idade 17 seidauk iha kartaun eleitorál.
“Joven sira-ne’ebé sei kontinua eskola presiza eleitorál, maibé to’o agora atendimentu seidauk to’o iha nível postu,” Administradór Postu Administrativu Baguia hateten iha Vila Nova, Baukau, segunda ne’e.
Nia husu ba responsável serbisu iha STAE Baukau atu hahú halo atendimentu to’o rurál hanesan tinan hira bá kotuk nune’e bele fasilita vontade foun sira inklui renova kartaun biométriku ba komunidade ne’ebé kartaun aat no lakon liuliu idade idozu tanba fatór idade.
“Ami hakarak husu STAE koordena ho nasionál oinsá bele habelar atendimentu to’o iha nível postu,” Mário sujere.
Iha fatin ketak, Diretór STAE Baukau, Natividade Freitas Guterres, hateten nia parte iha ona planu kona-ba prosesu atendimentu kartaun eleitorál biométriku hodi dezloka téknika sira halo atendimentu ba komunidade iha baze nune’e STAE sei fó-sai oráriu ba kada postu no sei realiza iha inísiu trimestrál datoluk tinan-ne’e.
“Komesa iha Juñu laran ami sei bá loron sanulu iha postu ida atubele atende ho sistema móvel,” Natividade hateten.
Entretantu, Postu Administrativu Baguia hamutuk suku sanulu kompostu Afaloikai, Alawa Kraik, Alawa Leten, Defawasi, Haekoni, Larisula, Lavateri, Osso Huna, Samalari no Uakala ho totál populasaun hamutuk 15.732 husi uma-kain rihun 3.392.
Jornalista: Natalino Belo
Editór: Xisto Freitas da Piedade
