BAUKAU, 27 Maiu 2025 (TATOLI)–Institutu Superiór Cristál (ISC) dezloka estudante husi Fakuldade Siénsia Medisina hamutuk na’in-594 hala’o estájiu iha Munisípiu Baukau.
Vise Dekanu Fakuldade Siénsia Medisina ISC, Muhamad Syarifudin, esplika objetivu husi estájiu referidu ho alvu ba saúde família no saúde adultu liuliu ema idade avansada sira nune’e bele eleva estudante sira-nia kapasidade hasoru komunidade.
“Esperansa durante estájiu, estudante sira bele aproveita momentu sira-ne’e atu aprende buat barak sai bukae iha futuru,” Vise Dekanu Fakuldade Siénsia Saúde ISC hateten iha salaun apuramentu Administrasaun Vila Nova, Baukau, tersa ne’e.
Nia salienta, husi numéru referidu, estudante ne’ebé destaka iha Baukau atu halo estájiu kompostu husi departamentu tolu hanesan Departamentu Nesesidade Bázika Umana, Espesializasaun no Komunitáriu.
Sekretáriu Munisipál Asuntu Planeamentu Investimentu no Dezenvolvimentu Integradu, Eduardo Filipe Ximenes, hateten durante prosesu estájiu kada estudante sei hasoru difikuldade hanesan hasoru ambiente foun, maibé sei fortifika mentalidade kada estudante atu esforsu liután hodi hasoru estudu.
“Hanesan autoridade husu durante estájiu foku ba objetivu. Atividade ne’ebé laiha relasaun ho imi-nia atividade labele tuir,” Eduardo hato’o.
Eduardo husu ba estajiáriu hotu atu kumpri regra husi ISC no obedese ba lideransa iha fatin estájiu liuliu partisipa iha atividade estra hanesan implementa iha suku, postu inklui munisípiu no evita partisipa iha atividade ne’ebé laiha benefísiu durante hala’o estájiu.
Entretantu, husi totál estudante na’in-594 sei hala’o estájiu ho durasaun fulan-rua kompostu estudante Departamentu Nesesidade Bázika Umana hamutuk na’in-117, kompostu parteira na’in-79 no enfermajen na’in-38. Estudante Espesializasaun hamutuk na’in-276, kompostu parteira 145 no enfermajen 131 no Komunitáriu hamutuk na’in-201 kompostu parteira 27 no enfermajen 174.
Jornalista: Natalino Belo
Editór: Xisto Freitas da Piedade
