BAUKAU, 26 Maiu 2025 (TATOLI)–Vítima dezastre naturál husi Postu Administrativu Baguia, Munisípiu Baukau, seidauk simu apoia emerjénsia husi Autoridade Protesaun Sivíl (APC-sigla portugeza).
Administradór Postu Administrativu Baguia, Mário Xavier da Silva, informa komunidade husi Baguia hamutuk uma-kain 35 iha tinan-ne’e sai vítima ba dezastre naturál kauza husi akontesimentu udan no anin-boot inkluindu inséndiu ne’ebé rezulta uma no koziña (dapur) hetan estragu.
“Ami nafatin hein. Iha karik bele halo distribuisaun ona. Ami esforsu kontatu ba diresaun atu tempu badak bele halo distribuisaun,” Administradór Postu Baguia hateten iha Vila Nova, Baukau, segunda ne’e.
Mário salienta pesoál pontu vokál destakadu iha postu halo ona levantamentu no relata ona dadus ba parte APC ne’ebé identifikadu rejista husi Suku Afaloikai, Defawasi, Larisula, Samalari no Lavateri.
“Komunidade uma-kain 35 iha Baguia seidauk simu,” Mário Xavier haktuir.
Iha fatin ketak, Komadante Operasaun Autoridade Protesaun Sivíl Munisípiu Baukau, Francisco Viana Freitas, esplika tuir dadus komunidade husi Baguia ne’ebé sai benefisiáriu ba dezastre naturál hamutuk uma-kain 67, kompostu uma-kain 25 mak hetan ona apoia emerjénsia enkuantu restu tuir planu sei apoiu iha tempu besik.
“Semana ne’e ami sei apoiu tan uma-kain 42, tanba dadus iha hotu ona,” Viana hateten.
Viana hatutan, APC sei kontinua halo verifikasaun dadus estragu husi totál númeru vítima ne’ebé rejistradu iha postu Baguia antes submete ba nasionál hodi hetan apoia materiál rekuperasaun husi nasionál.
Entretantu, apoia emerjénsia ne’ebé sei distribui kompostu hahán hanesan fós, mina, supermie no la’ós hahán kompostu lona, ekipamentu koziña no seluk tan.
Jornalista: Natalino Belo
Editór: Xisto Freitas da Piedade
