DILI, 28 Maiu 2025 (TATOLI)—Governu liuhusi Ministru Juventude, Desportu, Arte no Kultura (MJDAK), Nelyo Isaac Sarmento, husu ba ema hotu atu kontribui másimu ba realizasaun jogu Komunidade Nasaun Ko’alia Lian Portugés (CPLP, sigla portugés), atu bele la’o ho susesu hodi hamorin Timor-Leste nia naran.
Notísia Relevante: Timor-Leste nia preparativu ba jogu CPLP iha faze importante tolu
“Jogu CPLP ne’e festa ita-nian. Mai, ita hamutuk sai uma-na’in di’ak, uma-na’in di’ak la’ós de’it ha’u mak atu sai uma-na’in di’ak maibé ita hotu nu’udár timoroan hela iha kapitál Dili kria pás, atu bele simu ita-nia bainaka sira ho di’ak,” Ministru Nelyo hateten ba Agência TATOLI liuhusi programa “Entrevista Eskluziva” ho topiku “Preparasaun ni Importánsia Jogu CPLP iha Timor-Leste” iha estúdiu TATOLI, iha Faról, kuarta ne’e.
Nia dehan, sidadaun hotu bele hamutuk fó sapoiu ba atleta husi nasaun ne’ebé de’it, maibé keta haluha fó apoiu másimu mós ba Timor-Leste nia atleta sira bainhira hala’o jogu.
“Ita-nia atleta sira ho idade-ne’ebé kiik-oan de’it, sira presiza ita-nia apoiu. Manán mós ita orgullu, lakon mós ita orgullu. Maibé, ita fó vontade nafatin ba sira atu aprende hodi bele hetan rezultadu di’ak,” Ministru ne’e afirma.
Jogu CPLP ba tinan ida-ne’e sei realiza iha fulan-Jullu ne’ebé sei hahú iha 17 Jullu noa sei konklui iha 27 Jullu 2025, ne’ebé sei partisipa husi nasaun membru sira hanesan Portugál, Brazil, Guine Bissau, Guine Equtoriál, Moçambique, São Tome e Principe, Cabo Verde, Angola no Timor-Leste rasik.
Total orsamentu ba jogu CPLP husi preparasaun to’o remata, Governu tau ona orsamentu tinan 2025 nian ho montante millaun $3.7.
Jogu CPLP tinan ida-ne’e sei hetan partisipasaun másimu husi Estadu-membru sira, ho delegasaun hanesan Angola ho partisipante 101, Brazil 101, Cabo Verde 101, Guiné-Bissau 61, Guiné Equatoriál 35, Moçambique 70, Portugál 101, São Tomé e Prínsipe 35 no Timor-Leste 101.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Notísia Relevante: Jogu CPLP 2025: Brazil seidauk konfirmadu haruka atleta mai Timor-Leste
Notísia Relevante:
Jornalista : Hortencio Sanchez
Editór : Cancio Ximenes
