DILI, 30 Maiu 2025 (TATOLI)—Ministru Juventude, Desportu, Arte no Kultura (MJDAK), Nelyo Isaac Sarmento, no Prezidente Komité Ezekutivu Banku Nasionál Komérsiu Timor-Leste (BNCTL-sigla portugés), Marcelo da Cruz Carvalho, sesta ne’e, asina akordu hodi fó apoiu ba jogu Komunidade Nasaun sira Ko’alia Lian Portugés (CPLP-sigla portugés) ne’ebé sei realiza iha 17-27 Jullu 2025,.
Notísia Relevante: Timor-Leste nia preparativu ba jogu CPLP iha faze importante tolu
Akordu ne’e prevee konjuntu apoiu ida husi BNCTL, prinsipalmente lojístiku no promosionál, esensiál ba realizasaun eventu, reafirma kompromisu ba dezenvolvimentu desportu no juventude iha Timor-Leste.
Ministru Juventude, Desportu, Arte no Kultura (MJDAK), Nelyo Isaac Sarmento, konsidera katak apoiu husi setór finanseiru ne’e importante atu promove atividade desportu.
“Asinatura protokolu ne’e ho BNCTL hatudu katak instituisaun timoroan sira unidu iha misaun projeta Timor-Leste iha espasu luzófonu nian. Apoiu hosi BNCTL esensiál hodi garanti susesu husi jogu sira no reafirma potensiál nasaun nian hodi sai uma-na’in ba eventu internasionál boot sira,” Governante ne’e hateten iha Lecidere.
Governante ne’e esplika, apoiu lojístiku BNCTL nian kompostu husi transporte, produsaun farda ba ekipa okazional sira entre sira seluk.
Aleinde ne’e, Prezidente Komité Ezekutivu BNTL, Marcelo da Cruz Carvalho, hateten apoiu ne’e kompostu husi purvolta rihun $90 ba eventu internasionál CPLP nian.
“Parseria ne’e reprezenta pasu importante ida iha mobilizasaun rekursu nasionál ba eventu ida ho dimensaun internasionál ne’ebé sei koloka Timor-Leste iha sentru desportu no juventude nian iha jogu CPLP,” Marcelo dehan.
Notísia Relevante: Governu husu ema hotu kontribui másimu ba realizasaun jogu CPLP
Jornalista : Hortencio Sanchez
Editór : Cancio Ximenes
