Setembru 2025, selesaun nasionál sei kompete jogu AFC U-23 iha Xina

DILI, 02 Juñu 2025 (TATOLI)–Ekipa Selesaun Nasionál ne’ebé idéntiku ho naran istimadu Lafaek sei halo preparasaun másimu liutan hodi kompete jogu internasionál Asian Football Federation (ACF) U-23 ne’ebé realiza iha Xina, iha Setembru 2025.

“Ba jogu AFC nian ita tenke esforsu makaas, tanba ita sei kontra nasaun mesak makaas de’it iha jogu ne’e. Maibé, ami tau konfiansa ba ita-nia treinadór Simón, jogadór sira maioria dixiplina, ita fiar katak iha jogu ne’e bele hatudu rezultadu di’ak,” Diretór Tékniku Federasaun Futeból Timor-Leste (FFTL), Gaspar Quintão, hateten ba Agência TATOLI iha edifisiu FFTL Dili, segunda ne’e.

Sorteiu Tasa Ázia U-23 2026, ne’ebe hala’o ona iha AFC House, Kuala Lumpur, loron 29 fulan-Maiu 2025, Selesaun Timor-Leste tama iha pot-3, ne’ebé iha Grupu D hamutuk ho Austrália, Xina no Northern Mariana Island.

Nune’e, ekipa hamutuk 44 mak sei partisipa iha kualifikasaun ba Tasa Aziátiku U-23 2026, ne’ebé fahe ba grupu 11.

Kompetisaun ba billete 15 hodi kualifika ba Tasa Aziátika U-23 2026 ne’ebé sei hala’o iha Arábia Saudita iha fulan Janeiru tinan 2026, no manán-na’in grupu nian iha serteza atu kualifika, enkuantu billete haat seluk sei konkore husi ekipa Runner-up ne’ebé di’ak-liu.

Kualifikasaun Tasa Ázia U-23 2026 sei hala’o iha loron 01 to’o 9 Setembru tinan 2025, no espesifikamente iha Grupu D nian nasaun Xina mak sei sai hanesan uma-na’in.

Entretantu, Timor-Leste hahú partisipa iha kualifikasaun AFC U-23 Kopa Azia iha tinan 2016 ho totál partisipasaun iha edisaun lima (5) husi tinan 2016, 2018, 2020, 2022 no 2024, no tuir estatístika, totál Jogus 15, manán 3, lakon 12, produtividade golu 10 no sofre golu 38.

Jornalista : Hortencios Sanchez

Editór       : Cancio Ximenes