DILI, 04 Juñu 2025 (TATOLI)—Ministériu Administrasaun Estatál (MAE) rejista ona konkorente na’in-sia ne’ebé aplika ba konkursu Prezidente Autoridade Munisípiu (PAM) Dili.
Diretór Jerál Dezentralizasaun no Governu Lokál, António Agosto Guterres, hateten, ekipa finaliza ona prosesu, bainhira konkorrente konklui lista maka aban ka bainrua sei submete dokumentu ba Ministru Administrasaun Estatál.
“Ministru mak sei haree no tetu hodi aprezenta proposta ba Primeiru-Ministru. Entaun, hafoin Ministru Administrasaun Estatál submete ona ba Konsellu Ministru maka kompeténsia tomak Primeiru-Ministru mak sei fihir. Katak sé mak elijível ka ema ne’ebé mak kompetente, profisionál no iha kapasidade sei nomeadu hodi bele asume kargu hanesan Prezidente Autoridade Dili,” Diretór Jerál informa iha salaun enkontru MAE, Kaikoli, Tersa ne’e.
Notísia relevante : Gregorio Saldanha anúnsia razaun ba renúnsiu
Nia dehan, PAM eleitu tenke fuan boot, iha vontade no kompromisu forte hodi asegura responsabilidade, maski ninia estatutu ketak maibé hanesan nomeadu ida tenke iha kapasidade di’ak, liuliu iha esperiénsia rejime autonomia administrativa.
Diretór ne’e konsidera, Dili diferente ho munisípiu sira seluk, tanba hanesan sentru polítiku, komersializasaun, no konsentrasaun ba ema hotu-hotu, aleinde ne’e hanesan mós odamatan boot tama no sai iha kapitál nasaun nian.
“Ita presiza ema ne’ebé mak iha desizaun no responsabilidade polítika, hala’o serbisu mós hanesan responsabilidade administrativu, finanseiru, sosiál no atendimentu ba ema hotu ho tratamentu hanesan, ikus liu nia tenke iha responsabilidade garante jurídiku,” nia katak.
Konkursu ida-ne’e hahú loke iha loron 21 Maiu no taka iha loron 03 Juñu 2025, ne’eé fó oportunidade de’it ba selesionadu na’in-ida mak sei hetan nomeasaun direta husi Primeiru-Ministru hodi asume knaar hanesan PAM Dili.
Jornalista : Alexandra da Costa
Editora : Julia Chatarina
