BAUKAU, 03 Juñu 2025 (TATOLI)—Vítima violénsia bazeia ba jéneru hamutuk na’in-20 hetan apoia orsamentu husi Organizasaun Naun Govermentál Rekuperasaun Psikososiál no Dezenvolvimentu (PRADET-sigla ingleza) Munisípiu Baukau.
Koordenadora PRADET Baukau, Joana da Costa, esplika vítima na’in-20 referida sai benefisiáriu tanba enfrenta problema ekonomia família ne’ebé kauza husi violénsia bazeia ba jéneru nune’e PRADET identifika liuhusi nesesidade tuir rendimentu kada benefisiáriu.
“Ami-nia apoiu ne’e ba kada pesoál ho kustu $350 ne’ebé ami oferese ho tipu negósiu tolu hanesan loke kioske, ortikultura no fa’an roupa,” Joana da Costa hateten iha Vila Antiga, Baukau, tersa ne’e.
Nia esplika, orsamentu ne’ebé apoia maihusi doadór Uniaun Eropeia liuhusi PRADET ne’e ho objetivu atu hadi’a kondisaun ekonomia família.
PRADET konsidera ho apoia ne’ebé fó importante utiliza orsamentu ho responsabilidade nune’e bele ajuda hadi’a kondisaun uma-laran liuliu rendimentu família.
“Ita husu para atu utiliza fundu ne’ebé oferesidu ne’e ho resposabilidade. Tenke sai ezemplár ba maluk seluk atu loke espasu para sira bele hetan oportunidade ne’ebé hanesan,” Joana informa.
Iha fatin hanesan, benefisiária Umbelina Soares agradese ba apoiu tomak no promete sei utiliza fundu ne’e halo negósiu hodi sustenta ekonomia uma-laran.
“Presiza duni apoiu ne’e atu halo negósiu tempe hodi fa’an iha merkadu atu sustenta ekonomia família,” Umbelina hateten.
Entretantu, totál benefisiáriu na’in-20 referida maihusi munisípiu tolu kompostu husi Vikeke na’in-tolu, Lautein na’in-ida no Baukau 16.
Jornalista: Natalino Belo
Editór: Xisto Freitas da Piedade
