DILI, 05 Juñu 2025 (TATOLI)—Diretór Departamentu Tránzitu Seguransa Rodoviária Nasionál, Superintendente Asistenste Polísia Luís da Costa, hateten iha fulan-Maiu, tinan ne’e, Komandu Polísia Nasionál Timor-Leste (PNTL) liuhusi Departamentu Tránzitu Seguransa Rodoviária Nasionál rejista kazu asidente hamutuk 203.
“Atu atualiza ba públiku kona-ba dadus asidente durante fulan-Maiu nia laran. Iha fulan-Maiu, ita rejista kazu asidente tráfegu hamutuk 203. Husi kazu 203 ne’e, ema lakon vida iha na’in-lima, kanek todan iha 29 no kanek kamaan iha 169,” Luís hateten ba jornalista sira iha nia kna’ar fatin, Komandu Jerál PNTL, Kaikoli, kinta ne’e.
Nia dehan, husi kazu asidente ne’e, PNTL rejista iha ida mak hetan nia finalidade iha Tribunál, prosesu tama ona ba Tribunál mak tolu, no sei iha prosesu nia laran 111, nune’e rezolve entermu infratór hamutuk 88.
“Fator ne’ebé mak dominante ba iha asidente sira-ne’e mak fatór umanu, komportamentu ema mak rezulta asidente via públiku iha territóriu laran tomak,” nia informa.
Nia hatutan PNTL liuhusi Tránzitu Seguransa Rodoviária mós hala’o check point no mós halo patrullamentu iha munisípiu 13. Husi atividade referida, fulan-Maiu nia laran PNTL hatama reseita ba kaixa Estadu hamutuk $61.299.
Luís esklarese katak reseita sira-ne’e mai husi atividade check point no karreta tama mai iha pontu entrada haat iha fronteira, Batugadé, Mota-Masin, Sakato no Oésilu.
Komandu PNTL Dili, nia esplika, okupa klasifikasaun dahuluk rekolla reseita barak liuhusi atividade check point, segundu mak Komandu PNTL Munisípiu Aileu, terseiru Komandu PNTL Munisípiu Ermera, kuartu Komandu PNTL Baukau no ikusliu mak Seguransa Tránzitu Rodoviáriu.
Luís mós informa katak ba reseita husi fronteira ne’e, iha fulan-Maiu, karreta lijeiru no pezadu ne’ebé tama pontu entrada haat ne’e hamutuk 1.330. Transporte ne’ebé entrada mai iha territóriu nasional, karreta pezada hamutuk 679, enkuantu transporte lijeiru iha 651. Nune’e, hatama reseita ba kaixa Estadu hamutuk $20.196.
Jornalista: Natalino Costa
Editór: Xisto Freitas da Piedade
