DILI, 05 Juñu 2025 (TATOLI)-Prezidente Parlamentu Nasionál (PPN), Maria Fernanda Lay, simu vizita kortezia husi delegasaun País Afrikanu ho ko’alia Lian Portugés no Timor-Leste (PALOP-TL).
Delegasaun ne’e kompostu husi nasaun Angola, Kabu Verde, Giné-Bissau, Mosambike no Saun Tomé no Prínsipe.
“Enkontru ho PRO PALOP ohin hodi halo avaliasaun ba benefísiu no dezáfiu ne’ebé iha programa anteriór Timor-Leste mós sai benefisiáriu”, PPN dehan.
Programa ne’ebé durante ne’e PALOP apoia ba Parlamentu mak reforsu instituisionál, finansa públika hodi tulun deputadu sira hala’o knaar ho di’ak liu hanesan halo fiskalizasaun ba ezekusaun orsamentu husi Ezekutivu hodi garante ezekusaun ho di’ak no lori rezultadu ba povu.
“Reforsu institusionál, apoiu Parlamentu no komisaun sira. Sira mós apoia ba instituisaun kontrolu hanesan Kámara Konta, Prokuradoria Jerál Repúblika, Polísia Sientífika no Investigasaun Kriminál”, akresenta.
Maria Fernanda Lay nota katak kooperasaun ne’e iha benefísiu no partilla mós esperiénsia ho país sira seluk ne’ebé hola parte iha PRO PALOP.
“Klaru Timor-Leste ki’ik, ita bele partilla ho sira iha kontestu sira-nia ho kontestu Parlamentu, Kámara Konta. Ita espera programa PRO PALOP nian sei bele benefísia nafatin Timor-Leste iha kontestu ida-ne’e, haree iha futuru PRO PALOP bele kontinua apoia”, nia espera.
PPN haktuir katak durante sorumutu nia parte partilla mós esperiénsia Lei Fundu Minarai ne’ebé transparente tebes tanba kada tinan hasai relatóriu no bainhira foti osan iha ne’eba tenke liuhusi Parlamentu no labele foti diretamente. Aleinde ne’e, saldu fundu tun ka sa’e populasaun tomak bele haree iha site ne’ebé públika sai.
“Buat hotu liuhusi mekanizmu ida, transparánsia Fundu Minarai nian no ita hola parte iha EITI sistema transparánsia [Extractive Industries Transparancy Inisiative]. Iha mundu ita iha okupa pozisaun datoluk iha no pozisaun dahuluk iha ita-nia rejiaun”, hateten
“Ne’ebé ita iha reforsu ida-ne’e, sei la perturba ita-nia jestaun Fundu Minarai ninia rasik. Ita espera ho Greater Sunrise no mós rikeza minerál balun ne’ebé ita iha bele fó retornu no haboot tan ita-nia fundu soberanu”, salienta.
Nia dehan, Angola haree ba jestaun fundu, nune’e sira hakarak estabelese nota memorandu ida ho Timor-Leste iha futuru hodi bele serbisu hamutuk.
Notísia relevante: Xanana apoia kooperasaun entre PALOP-TL-UE foku ba dezenvolvimentu sustentável
Jornalista: Nelson de Sousa
Editora: Maria Auxiliadora
