Fundu Petrolíferu Timor-Leste sa’e ba billaun 18,43
DILI, 07 Agostu 2026 (TATOLI) – Fundu Petrolíferu Timor-Leste sa’e ba billaun $18,43, kompara ho trimestre anteriór ne’ebé iha billaun $18,3, haktuir relatóriu husi Banku Sentrál Timor-Leste (BCTL, sigla portugés).
Diretór-Ezekutivu Departamentu Jestaun Fundu Petrolíferu BCTL, Tobias Ferreira, relata katak reseita ne’ebé hetan durante períodu ne’ebé termina iha 30 Juñu hamutuk millaun $9,62 no rendimentu brutu husi investimentu millaun $719,09.
Husi montante ne’e, millaun $141,48 mai husi jurus, kupaun no dividendu sira ne’ebé simu no millaun $577,61 mai husi valór ativu investimentu sira. Tanba ne’e, taxa rentabilidade karteira Fundu Mina-rai iha merkadu finanseiru durante trimestre ne’e atinje 4,05%, aas liu índise referénsia ne’ebé rejista 3,99%.
Durante periódu ida-ne’e, totál levantamentu husi Fundu to’o millaun $603,8. Husi montante ne’e, millaun $600 transfere ba Konta Tezouru hodi finansia Orsamentu Jerál Estadu, enkuantu restante millaun $3,8 destina ba kobertura kustu jestaun investimentu sira.
Dezde kriasaun Fundu Petrolíferu, akumula ona reseita aproximadamente billaun 25,30 no rendimentu investimentu billaun $12,65, ne’ebé korresponde média anual 4,72%.
“Iha períodu hanesan, totál levantamentu atu finansia orsamentu Estadu atinje billaun $19,66”, nia informa.
Notísia relevante:Dezde estabelese Fundu Mina-Rai rejista reseita billaun $25,29 no retornu $11,93
Jornalista: Nelson de Sousa
Editora: Maria Auxiliadora
