TL-Mosambike asina akordu iha área importante tolu
DILI, 05 Juñu 2025 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas akompaña Prezidente Repúblika, José Ramos Horta, hala’o enkontru bilateral ho Xefe Estadu Mosambike, Filipe Jacinto Nyusi ho Mmebru Governu sira, iha Palásiu Prezidensiál.
Iha enkontru ne’e, Timor-Leste ho Mosambike, konkorda hodi estabelese kooperasaun iha área importante tolu liu husi Memorandu Entendimentu ne’ebé asina entre Ministru, Bendito Freitas ho nia omólogu Ministra Negósiu Estranjeiru no Kooperasaun Mosambike, Verônica Mocamo, inklui iha esplorasaun ba mina no gás (Hidrokarbonetus no Mina).
“Memorandu entendimentu ne’ebé foku ba área importante tolu mak hanesan estabelesimentu mekanizmu permanente ba konsultasaun polítika diplomátika, iha área edukasaun liuliu ba ensinu superiór, siénsia no teknolójia no ikus liu mak kona-ba ba esplorasaun mina no hidrokarbonetus,” Ministru Bendito hateten liu husi nota ne’ebé TATOLI asesu, ohin.
Prezidente Repúblika Mosambike mós husu Timor-Leste atu fahe esperiénsia ba sira kona-ba jestaun fundu soberanu ka fundu petrolíferu, tanba indústria estrativa ne’e, Timor-Leste iha esperiénsia ne’ebé avansadu ona.
Asuntu seluk ne’ebé ko’alia mós mak iha área saúde, agrikultura, dezenvolvimentu kapital umanu inklui kooperasaun multilaterál iha nível Nasaun Unida no organizmu multilaterál sira seluk ne’ebé Timor-Leste ho Mosambike bele tulun malu.
Prezidente Ramos-Horta mós husu Mosambike ne’ebé hanesan nasaun dahat iha organizasaun Cumunidade dos Países da Línua Portuguesa (CPLP), aleinde ne’e Portugal, Brazil no Angola, inklui mós nasaun membru CPLP sira seluk, atu loke harii Embaixada iha Timor-Leste, nune’e bele konsolida liután relasaun no kooperasaun entre Estadu membru sira.
Sorumutu ne’e, Xefe Estadu, José Ramos Horta, akompañadu mós Embaixadór Timor-Leste ba Mosambike, Luís Miguel de Sousa Siqueira no seluk tan.
Jornalista : Hortencios Sanchez
Editór : Cancio Ximenes
