KOVALIMA, 09 Juñu 2025 (TATOLI) –Kestaun rekursu umanu Tribunál Primeira Instánsia munisípiu Kovalima, Prezidente Tribunál Rekursu (PTR) lakohi promete atu halo kolokasaun tanba prosesu rekrutamentu ba juís sira presiza tempu.
“Ohin levanta kona-ba kestaun menus rekursu ha’u dehan lalika hanoin problema maibé ita rezolve problema atu dehan katak ho rekursu ne’ebé iha ita aproveita nune’e labele promete atu koloka juís sira, tanba bainhira atu halo rekrutamentu ba juís presiza tempu”, Prezidente Tribunál Rekursu, Afonso Carmona, dehan ba jornalista sira bainhira vizita Tribunál Munisípiu Kovalima, ohin.
Notísia relevante:PTR enkoraja juís kumpri oráriu julgamentu kazu iha Tribunál Kovalima
Prezidente Tribunál ne’e kompara katak prosesu atu halo rekrutamentu ba juís sira presiza tempu, la’os hanesan ho projetu atu finaliza lalais, tanba prosesu rekrutamentu presiza tuir regra ne’ebé iha ona.
“Ita bele rezolve ida bele mosu mós seluk maibé importante ita presta servisu nune’e iha futuru ita hanoin tanba juís na’in-13 daudaun ne’e tuir formasaun iha Portugal bainhira Juñu ne’e to’o, ita bele fó pose iha Jullu nune’e ita bele halo kolokasaun bele prienxe”, nia dehan.
Desizaun kolejiál
Autoridade judisiál ne’e informa, nia parte lakohi promete atu koloka tanba atu koloka rekursu ba tribunál sira ne’ebé mak menus rekursu, desizaun mai husi konsellu ne’e ho kolejiál.
Tuir dadus, juís ne’ebé presta servisu hodi halo atendementu ba kazu, hala’o julgamentu, juís ba kazu sívil na’in-ida no ba juís ba kazu krime iha Tribunál munisípiu Kovalima hamutuk na’in-haat.
Tuir dadus ne’ebé sekretariadu fó sai, entre Janeiru-Maiu 2025 ne’e, prosesu ne’ebé deside 43, pendente 347, prosesu ne’ebé mak iha desizaun no pena suspensaun sira kumpri pena sira hamutuk 2,289.
Prosesu tama iha Maiu 181, prosesu sívil 10 ne’ebé deside ona, ida. Nune’e, pendente kazu hamutuk kazu 190, ne’ebé pendente iha sekretáriu 55 prosesu sívil. Prosesu ne’ebé mak arkivu husi Janeiru to’o Maiu hamutuk 393.
Jornalista: Celestina Teles
Editór : Rafael Ximenes de A. Belo
