DILI, 05 Juñu 2025 (TATOLI)–Prezidente Autoridade Munisípiu (PAM) Bobonaru, Alexandrinho Pires, halo klarifikasaun kona-ba suspensaun provizóriu ba nia knaar ne’ebé hetan despaisu husi Ministru Administrasaun Estatál, Tomas do Rosário Cabral, tanba komete irregularidade.
“Kona-ba suspensaun husi Ministru ne’e loos katak Ministru rasik mak fó suspensaun provizóriu mai ha’u atu labele hala’o servisu administrativu to’o fulan-tolu, karik hetan fali ona autorizasaun foin ha’u kontinua serbisu hanesan baibain. Maibé ha’u hakarak fó fali ha’u-nia nama baik de’it,” PAM Bobonaru informa ba Ajénsia TATOLI, via telefónika, kinta ne’e.
Alexandrinho Pires konta tuir, kona-ba akuzasaun ba nia halo asédiu seksuál, parte Ministériu Saúde no Ministériu Administrasaun Estatál Bobonaru momentune’abá halo identifikasaun dadus iha Balibo.
“Kona-ba kazu ne’e vítima la aprezenta nia sasin ida mós laiha no tempu ne’ebá ema hotu-hotu mós iha no akontesimentu ne’e iha loron 13 Agostu 2024 iha oras tuku 22:00 kalan hodi halo tratamentu iha Sentru Saúde Balibo, tanba ha’u isin manas maka’as. Ha’u mós la’ós halo abuzu seksuál tanba ema mós barak iha momentu ne’ebá,” nia akresenta.
PAM rekoñese, kazu ne’e kontinua barullu fali iha Marsu 2025, nune’e nia sente hanesan agresaun fali ba nia-an, tanba ne’e nia loke prosesu karta ida ba Ministériu públiku maibé hetan resposta katak laiha indikasaun abuzu seksuál.
“Ne’e falsu, Tuir loloos nia mak ba levanta kazu ne’e, maibé nia labele levanta kazu ne’e tanba liu ona tempu fulan-neen ona no bainhira kazu sira liu ona fulan-neen ita labele levanta ona, maibé tanba públiku kestiona maka’as ne’e mak ha’u mós hakarak loke prosesu iha momentu ne’ebá,” Alexandrinho Pires, tenik.
Notísia relevante : Ministru Cabral indika ona Diretór ida hala’o knaar nu’udar PAM interinu Bobonaru
Ministru Administrasaun Estatál, Tomás do Rosário Cabral, indika ona Diretór ida hodi subtitui knaar provizóriu Prezidente Autoridade Munisípiu Bobonaru nian durante fulan-tolu.
Koordenadór Autoridade Munisípiu Bobonaru, Celestino Marques, hateten, nia parte simu despaisu husi Ministru Administrasaun Estatál hodi asume knaar provizóriu iha servisu administrativu Bobonaru.
“Ha’u hetan despaisu direta husi Ministru atu ajuda serbisu apoiu iha autoridade munisípiu nia fatin tanba Prezidente Autoridade Munisípiu ne’e hetan suspensaun, entaun ha’u hahú subtitui serbisu iha loron 30 Maiu 2025 ne’e kedas, maibé karik orientasaun ne’e hotu ona mak ha’u foin hala’o fali ha’u-nia serbisu hanesan baibain,” nia informa.
Jornalista : Alexandra da Costa
Editora : Julia Chatarina
