DILI, 09 Juñu 2025 (TATOLI)–Ajénsia informasaun ofisiál Estadu Timor-Leste, Institutu Públiku (Ajénsia TATOLI, I.P) liuhusi Departementu Aprovizionamentu no Lojístika, Segunda ne’e, entrega ekipamentu 51 pertense Patrimóniu Estadu, ne’ebé durante ne’e la utiliza no ho kondisaun a’at ba Diresaun Jerál Jestaun Patrimóniu Estadu (DJJPE) iha Ministériu Finansa (MF).
Ekipamentu hirak ne’e mak hanesan monitór ualu, CPU lima, laptop 13, printer haat, kamera ida, lensa kamera ida, EDP neen, televizaun ida, AC rua, voice record ualu no water dispenser rua.
Vise-Prezidente asuntu Administrasaun no Finanasa Ajénsia TATOLI, I.P, Madalena Pereira Carlos, hateten, instituisaun iha rejime jurídiku ne’ebé asegura beins moveis no imoveis rasik, katak fasilidade ne’ebé instituisaun ida uza to’o tempu a’at ona, mak sei fó fila bá Jerál Jestaun Patrimóniu Estadu hodi rai halo di’ak fali.
“Ekipamentu ne’ebé mak ajente sira uza ne’e pertense ba patrimóniu Estadu, ida-ne’e intensaun ne’ebé ita halo hodi kumpre lei ne’ebé iha no durasaun sosa ekipamentu sira-ne’e kuaze tinan-lima liu ona,” Vise-Prezidente Madalena hato’o ba jornalista, iha resintu edifísiu Ajénsia TATOLI, I.P, Farol.
Notísia relevante : Ministériu Finansa halo abertura leilaun ba patrimóniu Estadu
Nia dehan, bainhira iha falisidade balun mak a’at maka automátikamente hamenus fasilidade ne’ebé iha, nune’e parte instituisaun sei hatama fali proposta foun ida hodi subtitui fali fasilidade sira, liuhusi Orsamentu Jerál Estadu iha tinan tuir mai.
“Inisiativa ne’e bele ajuda funsionáriu sira bele serbisu ho di’ak no lais. Ha’u labele dehan ekipamentu ne’ebé daudaun TATOLI iha susfisiente liu, maibé ita-nia elementu TATOLI sira mesak ema kompetente no intelijénsia hodi hatene organiza oinsá fahe malu uza ekipamentu sira-ne’e, maibé ko’alia loos de’it katak bainhira ekipamentu a’at sira-ne’e sai ona, entaun normalmente ita mós falta ona ekipamentu,” Vise-Prezidente, tenik.
Fasilidade hirak ne’e sosa iha tinan 2017 to’o 2019, ne’ebé ekipamentu 35 sosa hafoin aprovasaun orsamentu no ekipamentu 16 seluk hanesaan doasaun husi Sekretaria Estadu Komunikasaun Sosiál (SEKOMS).
Jornalista : Alexandra da Costa
Editora : Julia Chatarina
