DILI, 11 Juñu 2025 (TATOLI) – Konsellu Ministru (KM) kuarta ne’e, aprova mós projetu dekretu-Lei, kona-ba alterasaun daruak ba Dekretu-Lei númeru 13/2016, loron 18 fulan-Maiu, ne’ebé Regula Fundu Infraestrutura.
Ministru Planeamentu no Investimentu Estratéjiku, Gastão de Sousa, esplika katak objetivu husi inisiativa lejizlativa ida-ne’e maka reforsa governasaun di’ak, transparénsia no responsabilizasaun iha jestaun Fundu Infraestrutura, garante partisipasaun boot-liu husi Xefe Governu iha desizaun sira kona-ba finansiamentu projetu ho importánsia boot ba dezenvolvimentu nasionál.
Gastão hateten alterasaun ne’e halo tanba antes ne’e aprova tiha ona alterasaun Lei Aprovizionamentu, ne’ebé kompeténsia balun atribui ba primeiru-ministru.
Nia subliña katak Lei Aprovizionamentu iha ligasaun mós ho Lei Kapitál Dezenvolvimentu, maibé alterasaun ne’e liuliu ba Fundu Infraestrutura, tanba iha área estratéjika ne’ebé rekere orsamentu ne’e tenke millaun $5 ba leten.
“Bainhira atu ezekuta, ami hakarak primeiru-ministru iha ne’ebá para bele akompaña no bele foti desizaun tuir polítika Governu nian. Tanba ida-ne’e maka ohin lori mai halo alterasaun ne’e, tanba tenke iha sinkronizasun iha Lei Aprovizinamentu no regulamentu Fundu Infrastrutura nian”, Gastão de Sousa hateten iha Palásiu Governu, ohin.
Nia adianta katak bazeia ba rekonfigurasaun kompeténsia foin lalais ne’ebé introdús husi Kódigu Aprovizionamentu no Kontratu Públiku foun, diploma ne’e esklarese papél Primeiru-Ministru nian iha deliberasaun sira husi Konsellu Administrasaun Fundu nian, liuliu iha projetu ho valór liu dólar millaun $5.
Diploma ne’e altera artigu 9.º, 10.º no 11.º husi regulamentu ne’ebé daudaun ne’e vigora, hodi reforsa kompozisaun no funsionamentu Konsellu Administrasaun nian, no mós introdús alínea foun ida ba artigu 4.º, ne’ebé esklarese objetivu públiku Fundu nian hodi hateten katak fundu ne’e bele mós finansia beins ne’ebé nesesáriu ba funsionamentu infraestrutura ne’ebé hetan apoiu.
“Ho alterasaun hirak-ne’e, Governu hakarak atu garante artikulasaun ida ne’ebé efikás liu entre objetivu estratéjiku sira investimentu públiku no jestaun rigoroza ba rekursu finanseiru Estadu nian”, konklui.
Notisía relevante: Governu implementa kódigu foun ba aprovizionamentu no kontratu públiku iha Jullu
Jornalista: Arminda Fonseca
Editora: Maria Auxiliadora
