DILI, 13 juñu 2025 (TATOLI)—Ekipa Coração FC obrigadu tenke fahe pontu ba malu ho nia adversáriu DIT FC, bainhira empata 1-1 iha jogu kontinuasaun Liga Futeból Timor-Leste (LFTL) époka 2025.
Jogu ba ekipa rua hala’o iha Estádiu Kafé Glenu Munisípiu Ermera, Sesta lorokraik ne’e.
Husi rezultadu jogu, hatudu momós katak ekipa rua laiha forsa diferente no duurante jogu la’o iha minutu 90 nia laran laiha ida mak manán no obrigadu tenke fahe pontu ba malu.
Golu Coração nia prodús husi nia jogadór avansadu Rofino Gama iha minutu 33 no golu DIT responde husi jogadór avansadu José Santos iha minutu 87.
Notísia relevante : Prezidente LFTL: Jogu Segunda Divizaun sei prolonga to’o 30 Maiu
Antes ne’e, iha jogu primeiru Coração kontra nia adeversáriu AS Ponta Leste maibé rezultadu ikus tenke fahe malu pontu tanba rezultadu 0-0.
Enkuantu, DIT FC iha jogu primeiru kontra nia adeversáriu Emmanuel FC rezultadu 3-3, nune’e ekipa rua mós tenke fahe pontu ba malu.
Daudaun ne’e tabela klasifikasaun provizóriu lidera husi Karketu DILI FC ho pontu tolu no klube sia seluk tenke okupa pozisaun ikus tanba balu pontu rua, balu pontu ida no balu pontu zero.
Jornalista : Hortencio Sanchez
Editora : Julia Chatarina
