Timor-Leste hato’o sentida kondolénsia bá vítima dezastre aéreu iha Ahmedabad
DILI, 13 Juñu 2025 (TATOLI) – Governu Timor-Leste hato’o sentida kondolénsia profunda ba vítima dezastre aéreu iha Ahmedabad, Índia.
Governu Timor-Leste hato’o ninia laran triste tebes no sentimentu ne’ebé kle’an ba trajédia ne’ebé akontese iha loron 12 fulan-juñu tinan 2025, iha sidade Ahmedabad, Índia, ne’ebé aviaun husi kompañia Air Índia nian ida, ne’ebé atu bá Londres, monu hafoin semo lakleur, hodi hamate pelumenus ema na’in-241.
Iha aviaun laran iha ema na’in-242 – pasajeiru na’in-230 no tripulante na’in-12 – ho nasionalidade oioin, ne’ebé inklui sidadaun indianu na’in-169, sidadaun britániku na’in-53, sidadaun portugés na’in-hitu no sidadaun kanadianu na’in-ida.
Governu Timor-Leste lamenta tebes ho ema sira-ne’ebé mate no hato’o sentidu kondolénsia ba família vítima sira hosi asidente trájiku ida-ne’e, ne’ebé sai hanesan epizódiu ida ne’ebé aat liu iha aviasaun sivíl iha dékada sira ikus ne’e.
Governu Timor-Leste manifesta nia solidariedade ba Governu no povu Índia, iha tempu lutu koletivu ida-ne’e, no hato’o mós solidariedade ida-ne’e ba Governu Reinu Unidu, Portugál no Kanadá nian, ne’ebé ninia sidadaun sira mós mate iha trajédia ida-ne’e.
“Ho laran-triste tebes, Governu Timor-Leste simu notísia kona-ba dezastre aéreu iha Ahmedabad. Ema barak maka lakon vida, inklui sidadaun sira hosi país amigu sira-ne’ebé iha lasu istóriku no kooperasaun nian, halo ami triste tebes. Ami hato’o ami-nia sinsera solidariedade ba Primeiru-Ministru Narendra Modi no povu indianu, no mós ba família sira hosi vítima sira hotu hosi trajédia ida-ne’e,” Ministru Prezidénsia Konsellu Ministru no Portavós Governu nian, Agio Pereira, fó-sai iha portál ofisiál Governu nian ne’ebé Tatoli asesa, sesta ne’e.
Notisia relevante: Aviaun Air India hetan asidente iha Ahmedabad, pasajeiru 241 mate no 1 lakon
TATOLI
