DILI, 14 Juñu 2025 (TATOLI)-Diresaun Nasionál Patrimóniu Estadu, Ministériu Finansa (DNPE) kontinua halo jestaun ba ekipamentu ho kondisaun fora husi utilizasaun (aat), ne’ebé rekolla ona husi instituisaun Estadu.
Pontu Fokál Instituisaun Estadu, José Paulo Noronha Lay, hatete ekipamentu ne’ebé ekipa rekolla sei entrega ba Diresaun Aliñasaun Lelaun hodi haree kondisaun, kondisaun di’ak sei halo lelaun maibé ladi’ak sei destroi ka halo doasaun.
“Buat sira-ne’e hotu depende ba superiór sira oinsá atu foti desizaun bazeia ba regras aprovizionamentu no haree mós ba lei tanba sasán balun ne’ebé labele uza ona ne’e ita bele destroi se-la’e bele fó doasaun ba instituisaun seluk karik presiza”, pontu fokál ne’e esplika ba jornalista liuhusi via telefone.
Patróminiu Estadu ne’ebé rekolla la’ós sasán eletróniku de’it maibé iha mós transporte.
Totál instituisaun ne’ebé durante ne’e sira rekolla hamutuk 23. “Sasán ne’ebé lelaun depende ba kualidade ekipamentu, baibain sasán sira-ne’e faan ho presu $50 ba leten. Enkuantu sasán eletróniku ne’ebé ami halo lelaun ema ladun sosa, transporte mak ema sosa barak”, nia informa.
Notísia relevante: Ajénsia TATOLI, I.P entrega ekipamentu 51 pertense patrimóniu Estadu ba DJJPE
Jornalista : Alexandra da Costa
Editora : Rita Almeida
