DILI, 18 Juñu 2025 (TATOLI)-Governu autoriza despeza ho montante millaun $16,47 ba ezekusaun obra konstrusaun instalasaun foun Institutu Politékniku Betanou (IPB) nian, iha munisípiu Manufahi.
Projetu ne’e aprezenta husi Ministru Planeamentu no Investimentu Estratéjiku, Gastão Francisco de Sousa.
“Ita boot sira hatene agora iha Betanu ne’e, iha Institutu Polítekniku ida, ne’ebé uluk Governu anteriór halo tiha ona landscape, projetu hotu ona. Agora ita atu bá halo konstrusaun, nune’e ohin husu autorizasaun Konsellu Ministru atu CNA loke prosesu aprovizionamentu fali”, Gastão de Sousa hateten iha Palásiu Governu, ohin.
Projetu ida-ne’e halo parte iha planu dezenvolvimentu integradu ne’ebé prevee ona iha Planu Estratéjiku Dezenvolvimentu Nasionál 2011–2030, ho objetivu sentrál atu hasa’e kualidade ensinu superiór no hametin formasaun rekursu umanu kualifikadu iha área estratéjika ba dezenvolvimentu nasionál.
Notísia relevante: Indemnizasaun ba família afetada ba konstrusaun edifísiu IPB hamutuk rihun $75-resin
Jornalista: Arminda Fonseca
Editora: Maria Auxiliadora
