Semana oin, SEFOPE haruka tan traballadór bá Japaun
DILI, 24 Juñu 2025 (TATOLI)—Sekretaria Estadu Formasaun Profisionál no Empregu (SEFOPE) sei haruka traballadór na’in-13 ba serbisu iha Japaun, semana oin.
“Parte Empreza Tsuneishi halo ona rekrutamentu ba ita-nia joven sira hamutuk 13. Husi númeru ne’e, iha na’in-12 bá serbisu iha área soldadura no na’in-ida ba ortikultura. Traballadór sira-ne’e sei aranka bá Japaun iha semana oin, 29 Juñu,” Sekretáriu Estadu Formasaun Profisionál no Empregu, Rogério de Araújo Mendonça ba jornalista sira, iha SENAI, Bekora, tersa ne’e.
Nia dehan, bainhira traballadór no parte SEFOPE prepara ona formasaun, depois sira tuir teste no hetan oportunidade bá serbisu iha rai-li’ur, Governu tenke halo serimónia despedida ba joven sira ne’ebé mak atu bá.
“Traballadór sira-ne’e bá serbisu durante tinan tolu no sira mós tuir formasaun iha-ne’ebá nune’e sira filafali mai uza kompeténsia ka abilidade ne’ebé mak sira hetan iha Japaun mai pratika iha ita-nia rai,” Rogério haktuir.
Nia relata, joven sira-ne’ebé mak serbisu ona iha Japaun hamutuk 32 no konta ho na’in-13 ne’ebé mak atu aranka hamutuk 45 ona.
Iha fatin hanesan, Diretór Nasionál Empregu Estranjeiru SEFOPE, João Correia Pereira, hateten traballadór na’in-13 sei bá serbisu iha Japaun, na’in-11 sei kolokadu iha Tsuneishi no na’in-rua iha Ibaraki.
“Traballadór na’in-11 husi Tsuneishi, sira sei fahe bá grupu idak-idak. Na’in-sia nu’udár soldadura no na’in-rua nu’udár scaffolding. Traballadór na’in-rua husi Ibaraki, na’in-ida sei bá iha área agrikultura hanesan ko’a lotus nia fuan iha bee laran no ida seluk sei ba toos,” João esplika.
Entretantu, Embaixadór Japaun iha Timor-Leste, Tetsuya Kimura, agradese ba ekipa téknika sira-ne’ebé mak prepara ona traballadór sira no fó ona formasaun ba joven sira atu bá serbisu iha Japaun.
“Tanba ne’e, ha’u fiar katak ita-boot sira nakonu ho esperansa kona-ba abilidade sira-ne’ebé mak ita-boot sira atu aprende iha Japaun no sei filafali mai Timor-Leste hodi implementa,” Tetsuya Kimura konklui.
Jornalista: Felicidade Ximenes
Editór: Xisto Freitas da Piedade
