AFTL realiza enkontru koordenasaun téknika ho klube LFTL

July 14, 2025
03:21 PM
Facebook Instagram X WhatsApp Telegram

Federasaun Futeból Timor-Leste (FFTL) hamutuk ho AFTL inklui Komisaun Organizadora Liga no Klube Futsál foto hamutuk hafoin realiza enkontru tékniku kona-ba Liga Futsál Timor-Leste iha Fundasaun Oriinte, Segunda (14/07/2025). Imajen TATOLI/Natalino Belo

DILI, 14 Jullu 2025 (TATOLI)—Asosiasaun Futsál Timor-Leste (AFTL) hamutuk ho Komisaun organizadora realiza enkontru koordenasaun téknika ho klube futsál relasiona ho realizasaun kompetisaun Liga Futsál Timor-Leste (LFTL).

Vise Prezidente AFTL, Ivan Alves, hato’o agradesimentu ua’in ba estrutura Federasaun Futeból Timor-Leste (FFTL), klube Futsál, Komisaun Organizadora Liga inklui parseiru hotu ne’ebé sai papél importante hodi realiza kompetisaun nasionál liga Futsál Timor-Leste iha epoka tinan-2025.

“Ita bele garante katak kompetisaun ida-ne’e bele realiza ho kualidade, organizadu no tuir padraun ne’ebé ita hotu hakarak,” Vise Prezidente AFTL hateten iha Fundasaun Oriinte, Dili, Segunda ne’e.

Ivan haktuir reuniaun téknika ne’e nu’udár pasu dahuluk no loke oportunidade atu entidade hotu hamutuk aliña vizaun no esplika regulamentu jogu ba klube sira nune’e preparadu no komprimitidu kontinua partisipa kompetisaun ne’ebé hotu-hotu hakarak sai transparente, organizadu no justu.

“Ita-nia hakarak liga ida-ne’e sai símbolu ba rezidénsia ho profesionálizmu,” Ivan subliña.

Iha fatin hanesan, Adjuntu Sekretáriu Jerál Federasaun Futeból Timor-Leste (FFTL), Fernando Xavier hateten estrutura husi federasaun hato’o apresiasaun no kontinua garante atu durante mandatu komprimitidu kompetisaun liga tenke realiza tanba parte husi dezenvolvimentu futeból Timor-Leste.

Xavier enkoraja AFTL atu nafatin esforsu gaña parseiru hotu atu envolve iha kompetisaun liga Futsál nune’e bele garante kompetisaun iha kualidade to’o susesu. Aleinde ne’e, husu estrutura klube Futsál sira atu kolabora no prontu iha situasaun hotu hodi fó susesu ba LFTL.

“Ha’u hakarak fó apresiasaun ba prezidente no dirijente klube tomak tanba ho sira-nia prontidaun iha kualker tempu apoia hodi realiza LFTL,” Fernando Xavier argumenta.

Entretantu, LFTL sei hahú halo abertura kompetisaun iha loron Sábadu, 18 Jullu, iha-ne’ebé sistema full kompetisaun ho klube hamutuk 18 kompostu Primeira Divizaun klube 10 no Segunda Divizaun ualu.

Jornalista: Natalino Belo

Editór: Xisto Freitas da Piedade