DILI, 15 Jullu 2025 (TATOLI) – Debate kona-ba alterasaun ba Lei Pensaun Vitalísia kontinua hanesan retórika polítika, tanba to’o agora Parlamentu Nasionál (PN) seidauk hatudu vontade atu halo mudansa ba lei ne’e.
Peskizadór legál husi Programa Monitorizasaun Sistema Judisiál (JSMP, sigla inglés), Luís Oliveira Sampaio, konsidera katak deklarasaun polítika husi bankada opozisaun no bankada Governu ba alterasaun lei ne’e ko’alia de’it, tanba sesaun lejislativa daruak ramata ona, no PN tama ona iha resesu, maibé seidauk iha inisiativa ruma atu aprezenta iha plenária ba mudansa lei ne’e, maski matéria ne’e sai ona kompromisu.
“Ne’e la’ós supreza mai ita, politikamente bankada opozisaun no bankada ukun ne’e nia deklarasaun polítika nakonu de’it ho retórika. Ita la haree [sira] manifesta vontade ida atu realiza kompromisu ne’ebé halo”, nia kestiona.
Luís Sampaio konsidera kompromisu ne’e hanesan instrumentu polítiku iha tempu kampaña, tanba laiha pasu konkretu ida. “Pasu konkretu mak sira mai ho proposta no aprezenta, [se] maioria la konkorda ne’e buat ketak ida”, nia hateten.
Nia lamenta katak Parlamentu seidauk iha sistema planeamentu lejislativu ida ne’ebé fó orientasaun no definisaun ba prioridade tinan ida, bazeia ba ezijénsia públiku nian ka rekomendasaun husi estudu parlamentár.
“Husi ne’e mak introdús ba planu asaun anuál. Lei ida-ne’e mak sai hanesan prioridade. Durante ne’e JSMP ezije atu kria ida-ne’e”, nia afirma.
Luís Sampaio subliña katak alterasaun Lei Pensaun Vitalísia tenke konsidera, tanba lei ne’e tinan barak fó benefísiu subsídiu ba eis-membru Parlamentu, no PN tenke haree ona kestaun ne’e.
“Agora polítika públika ho karáter sira ne’e kontinua eziste. Ida-ne’e bele sai ameasa. Ita iha problema sosiál barak ne’ebé povu iha kraik hasoru hela. Presiza tau atensaun, no parte seluk mós tuir projesaun husi Ministériu Finansa, ita-nia Fundu Minarai sei hotu iha tinan 2035 no Bayu Undan mós agora la halo ona produsaun”, nia preokupa.
Notísia relevante: PLP dezafia bankada Governu aprezenta inisiativa ba alterasaun Lei Pensaun Vitalísia
Jornalista: Nelson de Sousa
Editora: Maria Auxiliadora
