DILI, 16 Jullu 2025 (TATOLI) – Deputadu husi bankada CNRT, Domingos Augosto ‘Deker’, solisita ba Ministériu Obra Públika (MOP) atu orienta Institutu Jestaun Ekipamentu no Apoiu Dezenvolvimentu Enfraestrutura Institutu Públiku (IGEADE, I.P) atu normaliza estrada husi Letefoho ba Atsabe to’o ba Bobonaro.
Nia agradese ba ezekutivu tanba halo ona normalizasaun estrada husi Gleno ba to’o Letefoho. Maibé presiza kontinua normaliza estrada husi Letefoho ba Atsabe to’o ba Bobonaro. Tanba liuhusi kontaktu eleitorál, komunidade sira ezije atu normaliza estrada referidu, tanba agora tempu kafé atubele fasilita povu agrikultór asesu ba merkadu.
“Rekomenda ba Ministériu Obra Públika, atu orienta IGEAD, I.P, atu kontinua halo normalizasaun,” deputadu ne’e hato’o liuhusi reuniaun plenária komisaun permanente ba loron dahuluk, ohin.
Sorin seluk, deputadu CNRT, Patrocinio dos Reis Fernandes, levanta preokupasaun kona-ba ponte ida iha Mota Suai iha parte Kaikasa aat desde iha tinan 2019. Dalan ida-ne’e úniku liga postu Fatuberliu ho kapitál munisípiu Manufahi, presiza hetan atensaun hodi fasilita movimentu komunidade.
Deputadu FRETILIN, David Dias Ximenes, koloka kestaun estrada husi Fatuahi ba Darlau ne’ebé kondisaun ladi’ak.
Deputadu KHUNTO, António Verdial de Sousa, levanta rezultadu kontaktu eleitorál ne’ebé simu husi povu liga ho estrada diresaun husi ponte Loes ba Aidabalete no Biamarai ne’ebé ligasaun to’o ba postu Maliana. Hanesan reprezentante povu hatutan hela povu ninia preokupasaun presiza hetan atensaun husi ezekutivu bele fasilita povu lori sira-nia produtu lokál asesu ba merkadu.
Deputadu FRETILIN, Joaquim dos Santos ‘Boraluli’, foti kondisaun estrada husi Vikeke ba Lakluta ne’ebé kondisaun ladi’ak.
Reprezentante Governu liuhusi Vise Ministru ba asuntu Parlamentár, Adérito Hugo da Costa, hateten obra sira ne’ebé tau iha Fundu Infraestruta (FI) ba tinan ne’e daudaun iha projetu 20-resin iha faze konkursu públiku tempu badak sei fó sai empreza manán-na’in. Obra sira ne’e atu halo estrada, ponte no seluk tan ne’ebé atu hala’o husi Lospalos ba Com, Iliomar no Gleno ba Letefoho, Suai, Same no seluk iha territóriu.
Jornalista: Nelson de Sousa
Editór: Evaristo Soares Martins
