DILI, 16 Jullu 2025 (TATOLI) – Polísia iha kna’ar importante ne’ebé konsagra ona iha Konstituisaun artigu 147 atu defende legalidade demokrátiku no garante sidadaun sira-nia seguransa internu, nune’e sidadaun hotu presiza respeita membru Polísia Nasionál Timor-Leste (PNTL) bainhira hala’o sira-nia serbisu iha terrenu.
Prezidente Komisaun B trata asuntu Negósiu Estranjeiru ho Defeza no Seguransa, Domingos Augosto ‘Deker’, lamenta akontesimentu iha semana kotuk sidadaun xinés ida halo agresaun fíziku hasoru membru PNTL ida iha Dili. Tanba de’it membru autoridade seguransa ne’e bainhira hala’o hela kna’ar atu hapara hodi fó xamada atensaun ba sidadaun referidu kondús hela karreta, tanba liman sorin kaer bolanti no liman sorin simu telefone.
“Ha’u preokupa ita-nia komunidade sira, ne’ebé dalaruma lakon respeitu hasoru ita-nia membru PNTL, tanba ne’e alerta ba sidadaun timoroan no estranjeiru, ne’ebé hela iha Timor hotu-hotu hakru’uk ba lei,” n ia hato’o liuhusi reuniaun plenária komisaun permanente ba loron dahuluk, ohin.
Deputadu husi bankada CNRT ne’e husu bainhira membru autoridade seguransa hala’o knaar la tuir prosedimentu bele lori prosesu tuir lei ne’ebé vigór.
“Maibé, bainhira iha tempu ne’ebé sira hala’o hela kna’ar, tuir lei, sidadaun hotu atu respeita ba entidade garante pás no estabilidade iha ita-nia rai,’’apela.
Iha fatin hanesan Deputadu CNRT, Cedelizia Farria dos Santos, Patrocínio dos Reis Fernandes, Maria Gorumali Barreto, mós lamenta ho atetude referida. Tanba membru polísia hanesan lutu ba nasaun hodi garante orden no lei, seguransa, pás no estabilidade iha rai-laran. Nune’e husu atu prosesa sidadaun referida.
Deputadu FRETILIN, David Dias Ximenes ‘Mandati’, deskreve iha Lei Kódigu Penál ba agresaun fízika no dezobediénsia nu’udar krime maibé tribunál mak sei deside.
Vise Ministru ba asuntu Parlamentár, Adérito Hugo da Costa, mós lamenta atetude hasoru membru Polísia ne’e krime tenke prosesa.
Jornalista: Nelson de Sousa
Editór: Evaristo Soares Martins
