AINARO, 17 Jullu 2025 (TATOLI) – Prezidénsia Repúblika liuhusi Gabinete Sosiedade Sivíl no Asuntu Sosiál (SSAS), sei apoia konstrui uma dignu ba família vulneravel na’in-tolu ne’ebé ho kondisaun defisiénte iha Aldeia Hohulu, Suku Fatubessi, Postu Administravu Maubissi, Munisípiu Ainaru.
Família vulneravel na’in-tolu ne’e kompostu husi, José Maria Raimero ho idade ho idade 80 ho nia feton nain-rua mak Amelia Gonçalves Rodrigues ho idade 75 no Natalia Gonçalves Rodrigues ho idade 65.
Asesór Prezidensia Repúblika, Quintiliano Moniz, relata ekipa Prezidénsia Repúblika hala’o vizita mai iha Aldeia Hohulu, Suku Fatubessi ida ne’e bazeia ba orientasaun hosi Prezidénte Repúblika, José Ramos Horta, tanba iha loron hira ba kotuk ne’e nia-akompaña iha mídia sosiál haree kondisaun família vulnerável na’in-tolu ne’e.
Tanba ne’e, nia dehan ohin ekipa mai hala’o observa ba sira nia kondisaun real hanesan hela fatin no kondisaun moris. Alende ne’e haree mós sira-nia direitu ba idozu nian iha ona ka la’e, karik maka laiha buka soslusaun hodi bele kordena ho Ministériu Solidaridade Sosiál no Inkluzaun (MSSI) atu bele trata dokumentu ruma para família sira ne’e bele hetan sira nia direitu.
“Apoia nesesidade báziku sira. Prezidente Repúblika mós hanoin maka hari’i netik mahon ida ba sira no kria mós kondisaun moris ba sira. Kondisaun moris mak hanesan tau netik kioske ka halo toos ruma, ka haki’ak animál, nune’e iha sustentabilidade ba sira-nia moris lor-loron nian no ida ne’e maka importante,” dehan Asesór Quintiliano Moniz, bainhira entrega nesesidade bázika ba família vulneravél ne’e iha Aldeia Hohulu- Maubissi, kinta ne’e.
Asesór ne’e esplika bahira ekipa tuun iha terrenu haree kondisaun moris família sira ne’e identifika katak, José Maria Raimero, ho kondisaun moras entaun ekipa hakarak lori ba konsulta iha Dili, maibé tanba nia-lakohi tanba hanoin nia feto na’in rua ne’ebé nia kondisaun defisiénte hotu.
“Tanba ne’e ekipa bá Dili sei fila-fali mai ho doutór sira para halo tratamentu saúde ba José Maria Raimero,” nia dehan.
José Maria Raimero no autoridade lokál agradese PR Horta
Iha biban ne’e, Benefisiáriu, José Maria Raimero, agradese tebes ba Prezidente Repúblika, Jose Ramos Horta ho nia ekipa tanba apoia ona nesesidade bázika no apoia mós konstrusaun uma dignu.
“Tanba, ha’u-nia kondisaun moras kotuk laran no uza hela kateter, durante tinan-neen ho balu ona no ha’u la’o ladiak bainhira moras família sira sempre tula lori ba ospitál boot. Ha’u kataus ona ha’u la’o ladi’ak ida ne’e maka, ha’u husu ba Prezidente halo netik mahon ida ba ami nain-tolu” nia husu.
Entretantu, Xefe Aldeia Hohulu, Jelino Baros, hato’o mós agradesimentu ba Prezidente Repúblika ho nia ekipa tanba hakat to’o mai fatin ne’e hodi haree rasik kondisaun komunidade na’in-tolu ne’e ninian.
“Durante ne’e, ami hato’o hela relatóriu sira ba postu administrativu no ba munisípiu, maibé la iha ema ida maka atu tau matan. Husi ekipa Ministériu Solidaridade Sosiál no Inkluzaun (MSSI) maka apoia hela sira maibé atu hari’i netik uma ida ba sira ne’e mak seidauk,” nia haktuir.
Autoridade ne’e reforsa, nu’udar líder komunitáriu pronto apoia ekipa Gabinete Prezidente Repúblika atu organiza komunidade hodi konstrui uma dignu ba benefisiáriu referidu.
Jornalista : Francisco Sony
Editór : Florencio Miranda Ximenes
