Atleta Clara Monteiro husi Portugál vensedora iha korrida metru 3000
DILI, 21 Jullu 2025 (TATOLI)—Iha Modalidade Atletizmu klase korrida metru 3000 ne’ebé totál atleta lima mak kompete, Atleta Portugal Clara Monteiro Lucas Pires sai manán-na’in hafoin halai ho minutu 10:25.72 iha Jogu Desportiva Komunidade Lian Portugés (CPLP-sigla portugés) da dala-XII 2025.
Segundu lugár lidera husi atleta Kabuverde, Cibelle Rodrigues Delgado, ne’ebé halai ho tempu 10:25.89 no terseiru lugár lidera husi atleta Timor-Leste, Deonita Fátima Amaral Xavier halai ho tempu 11:24.02.
Durante kompetisaun, atleta sira hatudu idak-idak nia tátiku halai ho velosidade neineik hahú husi inísiu to’o iha set dalimak, maibé iha set daneen ka ronde ikus nian, kauze atleta Kabuverde mak lidera maibé besik iha meta atleta Portugal esforsu hodi duni tuir no halakon sira iha minutu ikus.
Atleta manán-na’in, Clara Monteiro Lucas Pires hateten nia orgullu bele hetan vitória iha korrida metru 3000 maski atleta husi Kabuverde mós halai maka’as.
“Ha’u sei esforsu liután hodi alkansa rezultadu ne’ebé di’ak iha faze tuirmai,” atleta ne’e informa ba jornalista sira iha Estádiu Dili, Segunda ne’e.
Iha oportunidade ne’e, tuir atleta timoroan ne’ebé okupa iha terseiru lugár, Deonita Fátima Amaral Xavier hateten nia sente ta’uk bainhira kompete tanba haree atleta sira seluk mesak altura maibé nia habrani-aan hodi esforsu to’o hetan terseiru lugár.
“Tanba ne’e, ha’u agradese ba treinadora Odete Belo no Federasaun Atletizmu Timor-Leste ne’ebé bele fó oportunidade mai ami hodi kompete,” nia relata.
Atleta sira-ne’ebé kompete iha klase ne’e mak hanesan Maria Clara Monteiro Lucas Pires husi Portugál, Deonita Fátima Amaral Xavier husi Timor-Leste, Anizimaela Correia Trov Oada Dias husi São Tomé e Príncipe no atleta Marina Cibelle Rodrigues Delgado husi Kabuverde.
Jornalista : Alexandra da Costa
Editór : Cancio Ximenes
