DILI, 21 Jullu 2025 (TATOLI)–Atleta husi nasaun portugál Laura Branco Jorge da Silva Agostinho ho nia belun Tiago André Barros dos Santos kontinua sai vensedór iha modalidade atletizmu korrida metru 100 iha Jogu Desportiva Komunidade País Lian Portugés (CPLP-sigla portugeza) ba dala-XII 2025.
Antes ne’e, atleta na’in-rua ne’e kompete iha faze eliminasaun dahuluk no daruak nian. Iha faze eliminasaun dahuluk, atleta Leonor Silva de Freitas kompete ho atleta na’in-lima no atleta Tiago André Barros dos Santos kompete ho atleta na’in-haat iha faze eliminasaun daruak nian.
Sira na’in-rua konsege manán hotu hodi kontinua avansa ba faze finál no iha faze finál atleta na’in-rua ne’e esforsu hodi lidera hanesan primeiru lugár to’o ramata.
Atleta Portugál ne’ebé sai vensedora, Laura Branco Jorge espresa sentimentu kontente tebes ho vitória ne’ebé nia hetan no konsidera ida-ne’e hanesan onra ida ba nia liuhusi esforsu másimu.
“Ha’u sei esforsu no prepara-aan liután tanba aban mós ha’u sei kontinua kompete iha klase saltu kumprimentu nian. Espera buat hotu la’o ho di’ak to’o ramata,” nia informa ba jornalista sira iha Estádiu Munisipál Dili, Segunda ne’e.
Laura konsidera katak ida-ne’e marka istória ida ba nasaun Portugál no mós ba nasaun Timor-Leste tamba bele kompete hamutuk iha jogu desportivu ida.
Entretantu, atleta Tiago André Barros dos Santos agradese tebes ba kompetisaun ida-ne’e hodi espresa sira-nia talentu halai nian.
“Maski iha faze eliminasaun ha’u sente hasoru dezafia uitoan maibé ho apoiu ne’ebé mak iha ha’u bele hatudu rezultadu ne’ebé mak di’ak,” nia espresa.
Nia mós lahaluha hato’o obrigadu ba Timor-Leste tamba bele tau-matan ona ba sira durante iha-ne’e hodi partisipa Jogu CPLP nian, Timor nia ema mesak di’ak tebes no kuidadu sira ho domin.
Entretantu, iha segundu lugár maskulinu nian atleta Portugál Miguel Marinho de Almeida mak okupa no iha terseiru lugár okupa husi Keny Alexandre Semedo Ramos husi nasaun Kabuverde (feminina), enkuantu iha korrida metru 100, atleta Portugál Leonor Silva de Freitas hetan segundu lugar no terseiru lugár okupa husi atleta Kabuverde, Silvanilda Carina Delgado Gomes.
Jornalista : Alexandra da Costa
Editór : Cancio Ximenes
