Xanana orgullu atleta Taekwondo ne’ebé manán medalla osan-mean
DILI, 24 jullu 2025 (TATOLI) — Primeiru-Ministru (PM), Kay Rala Xanana Gusmão, orgullu ho jogadór timoroan sira inklui atleta Taekwondo ne’ebé reprezenta Timor-Leste hetan medulla osan-mean iha jogu desportivu Komunidade Nasaun Sira Ko’alia Lian Portugés (CPLP, sigla portugés) ba da-12 iha Dili.
“Ha’u rona katak Portugál manán medalla ouru (osan-mean) 10 no ami manán medalla ouru ida iha Taekwondo. Pelumenus ami bele manán medalla ouru ida maske ami la’ós nasaun riku ida,” Xefe Governu hato’o apresiasaun ne’e hafoin hasoru malu Xefe Estadu iha Palásiu Prezidensiál, kinta ne’e.
Nia haktuir, maske desportu iha rai-laran sei fraku hela, Prezidente Repúblika mós sente kontente tebes tanba jogu CPLP hala’o daudaun iha Timor-Leste.
“Ita-nia desportu sira hatudu frakeza, maibé ne’e tanba sira la’ós profisionál, tanba sira-ne’e sei labarik eskola partisipa iha Jogu CPLP,” Primeiru-Ministru hateten.
Timor-Leste iha jogu CPLP liu husi atleta Sierra Nisa Xavier Pinto, atleta Taekwondo nian, hetan medalla osan-mean hafoin halakon nia adversáriu portugés iha finál kategoria Taekwondo ho kilograma 49 ho eskoru 2-0 iha Jogu CPLP ne’ebé hala’o iha Jináziu Dili, tersa-feira, 22 jullu tinan 2025.
Notisia relevante: Modalidade Taekwondo Timor-Leste hatudu mudansa iha Jogu CPLP
Jornalista: Hortencio Sanchez
Editór: Evaristo Soares Martins
