Komodoro Neves husu forsa komponente tolu hametin relasaun pesoál
DILI, 25 Jullu 2025 (TATOLI)-Komandante Komponente Navál, Komodoro Higino das Neves, husu ba forsa Komponente Terrestre, Navál no Aero Lijeira atu hametin relasaun hodi hametin servisu ho di’ak bainhira Estadu atribui misaun.
“Ha’u fiar ezersísiu kombinasaun arma 2025 ne’ebé imi tuir iha loron-14 nia laran ne’e ita-boot sira iha ona esperiénsia, liuliu husi ita-boot sira kria relasaun personál ba malu entre komponente tolu ne’e depois hatene oinsá maneira halo desizaun, oinsá koordena servisu ho autoridade hodi bele susesu iha misaun tuir saida mak ita tuir iha ezersísiu ida-ne’e”, hatete nia iha intervensaun bainhira ensera ezersísiu kombinasau arma C-25 ne’ebé hala’o iha Komponente Navál, sesta-ne’e.
Nia hatutan: “Ha’u husu nafatin imi tau koñesimentu ne’ebé imi hetan iha ezersísiu, nune’e bainhira ita-nia ulun fó knaar ba ita-boot sira bele kumpre misaun ne’ebé sira fó ne’e”.
Komodoro esplika ezersísiu ida-ne’e partisipa husi militár sira hamutuk 228, sira aprende, halo treinu navegasaun, uza arma hodi tiru depois halo ezersísiu fiziku no planeamentu liga ho Komandu sira, halo planu depois oinsá haree ninian asaun iha terenu, nune’e bele la’o di’ak.
“Treinamentu ida-ne’e importante tanba atu prepara-an ba ezersísiu kobra oin mai. Maski la’ós ba ida-ne’e de’it maibé ezersísiu ida-ne’e prepara forsa sira, prepara-an atu sai forsa ne’ebé profisionál iha eventu saida de’it. Liuhusi ezersísiu ida-ne’e importante ba militár sira, ita bele servisu hamutuk hodi hala’o misaun ida ne’ebé ita-nia Estadu atribui”, nia afirma.
Nia louva membru sira ne’ebé partisipa ezersísiu kombinasaun arma C-25, tanba hatudu sira-nia profisionalismu maske loron manas nia laran maibé kontinua hatudu espíritu abnegasaun hodi konklui ezersísiu ne’ebé halo iha baze Navál Hera no Sentru Instrusaun Komandante Nicolau Lobato iha Metinaru.
“Parabens ba ita-boot sira-nia susesu iha loron-14 nia laran liuhusi sakrifisiu barak maibé ohin ensera ezersísiu. Parabéns ba ita-boot sira, ba susesu ida-ne’e liliu komandante terrestre hodi fó hanoin ba komandante komponente rua halo ida-ne’e”, nia haktuir.
Neves hateten Xefe Estadu Maiór, Jenerál Forsa Armada Domingos Raul Falur Rate Laek, promete tinan-oin sei halo tán ezersísiu ne’e iha komponente terrestre maibé tau orsamentu ba tinan oin.
Nia dehan, hafoin ezersísiu kombinasaun arma ne’e forsa komponente tolu ne’e tenke servisu hamutuk ba interese nasionál. “Ha’u haree ita-boot sira iha motivasaun, tanba ne’e ha’u husu atu ita-boot sira bele servisu hamutuk ho ita-boot sira-nia komandante sira hodi hatudu kapasidade no maturidade hanesan militár no saida mak ita-boot sira hetan iha ezersísiu ida-ne’e”, nia afirma.
Komandante Komponente Navál afirma formsa ida-ne’e forsa kiik, ne’e duni treinu konjunta ne’e importante tanba operasaun saida de’it forsa tolu sei hamutuk nafatin hala’o.
“Forsa ida-ne’e sei entrega ba ita-boot sira loron-ida, ita-boot sira labele konta malu, ita forsa iha buat ruma salva hamutuk. Ko’alia konaba forsa ne’e, la’ós de’it kria iha terenu de’it, maibé iha situasaun ne’ebé forsa ida kuandu iha kotuk ida seluk kontinua ajuda hodi bele la’o hamutuk, ida-ne’e mak ita hakarak”, nia konklui.
Notísia relevante: Xefe Estadu Maiór Jenerál abertura treinamentu ba kombinasaun arma
Jornalista : Natalino Costa
Editora : Rita Almeida
