DILI, 25 Jullu 2025 (TATOLI) – Organizasaun Mundiál ai-han serbisu hamtuk ho Governu Timor-Leste atu luta kontra ra’es-badak (stunting) no má nutrisaun iha nasaun ne’e.
Diretór Nasionál Adjuntu no Responsável husi Programa Ai-han Mundial (WFP), Amin Said, informa katak durante ne’e WFP servisu hamtuk ho Governu liuhusi Ministériu Edukasaun (ME) no Ministériu Saúde (MS) atu hadi’a sistema kuidadu saúde primaria no merenda eskolar.
“Ministériu Saúde ita halo servisu hanesan, apoia Diresaun Nasionál Nutrisaun, tratamentu ba inan isin-rua, inan fó-susu no labarik tinan-lima mai kraik. Ajuda no fasilita hola ai-han nutritivu ba inan isin-rua sira hanesan hola batar-u’ut ka super sereal”, Amin Said, informa ba TATOLI, edifísiu Kaikoli, ohin.
Notísia relevante: https://tatoli.tl/2024/03/26/labarik-47-afeta-ma-nutrisaun-tanba-la-konsome-ai-han-nutritiva/
Nia dehan, sira kontinua apoia ME atu asegura produsaun foos fortifikadu ba merenda eskolar iha Munisípiu Baukau, Bobonaro, Manufahi no kontinua halo advokasia ba produsaun foos fortifikadu ba merenda eskolar iha territórriu tomak.
“Ita estabelese ona makina ba produsaun foos fortifikadu iha Munisípiu Baukau no Munisípiu Bobonaro. Iha tinan-2025 ida ne’e, WFP mós sei estabelese tan makina ida ba produsaun foos fortifikadu iha Munisípiu Manufahi. Inisiativa ida-ne’e atu asegura eskola hothotu iha territóriu tomak bele konsumu foos fortifikadu iha eskola” nia relata.
Responsavel ne’e haktuir, sira serbisu hamutuk ho Ministériu Sosiál Solidaridade no Inkluzaun (MSSI) atu hala’o programa prevensaun ba má nutrisaun no hamenus taxa labarik sira ho ra’es-badak (stunting) liuhusi programa pilotu ida hodi fornese asisténsia sosiál nian ba inan isin-rua, inan-fó-susu no labarik tinan rua mai kraik husi família uma-kain sira ne’ebé mak vulneravel liu.
“WFP hamutuk ho MSSI hodi suporta pakote ai-han nutritivu (super sereal no super sereal plus) hanesan programa prevensaun ida husi intervensaun lubuk balun ba redusaun má nutrisaun no stunting nian” nia akresenta.
Nia dehan, importánsia husi konsumu ai-han nutritivu, labarik sira sai saudavel, forte, sai matenek no bele kontribui ba dezenvolvimentu Timor-Leste iha futuru. Konsumu ai-han lokál ho variadade bele halo ema sai saudavel, tanba ne’e produsaun ai-han lokál ho diversidade ne’e xave importante ba nasaun ida.
“Labarik sira ne’ebe mak identifika ra’es-badak ne’e sofre króniku má nutrisaun. Tanba ne’e, sira-nia isin sei la krexe no dezenvolve ho kompletu ne’ebé iha nia futuru bainhira nia ba eskola nia sei labele kompete ho labarik sira ne’ebé mak ho nutrisaun di’ak, entaun presiza hahan nutrisaun ne’ebe di’ak”, nia konklui.
Notísia relevante: https://tatoli.tl/2023/11/23/timor-leste-nafatin-ho-problema-ma-nutrisaun-aas-iha-mundu/
Jornalista : Felicidade Ximenes
Editór: Rafael Ximenes de A. Belo
