Xina reafirma hametin amizade ho TL iha área defeza
DILI, 25 Jullu 2025 (TATOLI) – Embaixadora Xina iha Timor-Leste, Wang Wenli, reafirma kompromisu Governu Xina ba pás no hametin kooperasaun iha área defeza ho Timor-Leste.
Embaixadór Wang esplika, PLA ne’ebé harii iha tinan 1927, dezenvolve ona ba forsa modernu ida ne’ebé foka ba salvaguarda soberania no seguransa Xina nian, orientadu hosi vizaun Prezidente Xi Jinping nian hodi harii militár ida ho klase mundiál ne’ebé iha abut iha polítika defeza nian.
“Xina nia papél ativu iha manutensaun pás globál, ho tropa liu 1,800 ne’ebé agora daudaun koloka iha misaun sira ONU nian no kuaze tropa rihun 50 ne’ebé koloka dezde 1990,” Embaixadór Wang Wenli hateten iha ninia diskursu iha serimónia komemora aniversáriu fundasaun Libertasaun Populár (PLA) ba da-98 Embaixada Xina iha Timor-Leste, sesta ne’e.
Embaixadór elojia Timor-Leste nia apoia ba manutensaun pás no rekoñese F-FDTL nia kontribuisaun hanesan parte ida husi esforsu manutensaun pás globál.
Nune’e mós komemora tinan 80 finál Funu Mundiál Daruak hodi fó onra ba sakrifísiu sira-ne’ebé Xina no Timor-Leste halo durante luta anti-faxista mundiál.
“Ha’u husu ba nasaun sira atu defende dame, benefísiu mútuo no kooperasaun hodi rezolve disputa internasionál sira,” nia fó hanoin.
Nia fó hanoin katak vizita sira foin lalais ne’e husi Prezidente José Ramos-Horta no Primeiru-Ministru Xanana Gusmão ba Xina, hametin ona relasaun bilaterál sira no loke dalan ba kooperasaun militár ne’ebé habelar iha área sira hanesan formasaun, apoiu ba ekipamentu sira no troka profisionál sira.
Wang reafirma kompromisu Xina nian atu servisu hamutuk ho Timor-Leste hodi hasoru dezafiu seguransa globál no avansa futuru kompartilladu ba umanidade.
Iha fatin hanesan, Ministru Defeza Timor-Leste, Donaciano Gomes “Pedro Klamar Fuik,” parabeniza Xina no hato’o agradesimentu ba PLA nia apoia ne’ebé kontinua.
Nia reafirma kompromisu Timor-Leste nian hodi hametin nia parseria estratéjiku ho Xina, partikularmente iha setór defeza, ne’ebé nia deskreve hanesan instrumentu vital ida ba pás, seguransa no dezenvolvimentu nasionál.
Pedro Klamar Fuik nota katak, kooperasaun inklui formasaun téknika, infraestrutura ospitál militár no doasaun ekipamentu ne’ebé substansiál, kontribuisaun xave sira ba kapasidade operasionál no autonomia F-FDTL nian.
Jornalista: Hortencio Sanchez
Editór: Evaristo Soares Martins
