Projetu modernizasaun Merkadu Tuanau Baukau sei lansa iha Setembru
DILI, 28 Jullu 2025 (TATOLI)—Governu liuhosi Ministériu Komérsiu no Indústria kompromete sei lansa fatuk dahuluk relasiona ho projetu modernizasaun Merkadu Tuanau iha Vila Nova, Baukau, Setembru mai ne’e.
Ministru Komérsiu no Indústria, Filipus Nino Pereira esplika ministériu finaliza ona halo avaliasaun no selesaun dokumentu no atualmente sei halo preparasaun hodi avalia orsamentu no tuir planu sei ramata iha fulan-ne’e.
“Fulan-oin ita bele hahú anúnsia manán-na’in. Espera katak entre fulan-Agustu no Setembru bele lansa ona fatuk dahuluk,” Ministru Komérsiu no Indústria informa ba TATOLI iha sala konferénsia Ministériu Negósiu Estranjeiru no Kooperasaun (MNEK), Praia dos Coqueiros, Segunda ne’e.
Governante ne’e salienta katak sei halo koordenasaun ho Autoridade Administrasaun Munisipál (AAM) Baukau relasiona ho atividade negósiu ligadu ho vendedór iha-ne’ebé bainhira implementa projetu referidu sei iha impaktu ba atividade negósiu iha Merkadu Tuanau.
“Iha hala’o ona enkontru dahuluk, tanba AAM deside muda ona negosiante ba merkadu foun ne’e, entaun sei koordena atu fó espasu ba vendedór nune’e bele hahú konstrusaun,” Nino Pereira akresenta.
Merkadu Tuanau rasik hahú konstruidu iha tinan 2016 ho luan hamutuk ektare ualu iha-ne’ebé finaliza ona konstrusaun morru, uma bá fa’an sasán hamutuk unidade neen no tipu negósiu hamutuk 12.
Entretantu, projetu modernizasaun Merkadu Tuanau iha Baukau tuir planu Governu sei aloka orsamentu hamutuk millaun $7-resin ho durasaun kontratu tinan-ida.
Jornalista: Natalino Belo
Editór: Xisto Freitas da Piedade
