Fulan oin, Autoridade Kaibada reabilita irrigasaun liuhosi orsamentu PNDS
BAUKAU, 29 Jullu 2025 (TATOLI)—Autoridade Suku Kaibada Uaimua, Postu Administrativu Baukau Vila iha fulan-Agustu tinan ne’e, sei reabilita irrigasaun iha Aldeia Uani-uma liuhosi Programa Nasionál Dezenvolvimentu Suku (PNDS).
Xefe Suku Kaibada Uaimua, Cosme da Costa Lopez esplika reuniaun konsellu suku aprova ona proposta husi aldeia, iha-ne’ebé deside ho konsesualmente implementa atividade regulár síklu VII tinan-2025 tanba konsidera irrigasaun inportante hodi bele reativa hikas natar komunidade iha aldeia referida.
“Ita sei hein orientasaun husi PNDS munisípiu no postu. Bainhira fó-sai ona desizaun, posibilidade fulan-Agustu ita hahú ona,” Xefe Suku Kaibada Uaimua informa ba TATOLI via telefónema, Tersa ne’e.
Cosme Lopez informa katak hafoin ekipa tékniku PNDS finaliza levantamentu dadus, konsellu suku kontinua kedas deside kompañia Caucus mak fornese materiál fabrikadu, enkuantu kompañia Kaibada-oan responsavel ba materiál lokál inklui transporte.
Irrigasaun ne’ebé sei reabilita fasilita bee ba natar ho totál ektare 40 ne’ebé prevee orsamentu hamutuk $ 39.940, nune’e bainhira funsiona bele motiva komunidade atu hala’o vida nu’udár agrikultór iha Kaibada.
Suku Kaibada Uaimua hamutuk aldeia tolu kompostu husi Ana-uaru, Uani-uma, Hau-robu ho totál populasaun hamutuk 3000-resin no uma-kain 600-resin.
Jornalista: Natalino Belo
Editór: Xisto Freitas da Piedade
