BAUKAU, 04 Agostu 2025 (TATOLI) – Governu liuhusi Vise Minustru Asuntu Fortalesimentu Instituisionál organiza semináriu nasionál ida ho tema ” Educação Civica de divulgação do sistema justiça, As Leis e os Direitos Fundsmentais dos Cidadão Para Criar Confiança no Sistema de Justiça” oinsá atu konsensializa sidadaun sira-nia hanoin nune’e bele hakribi violénsia no promove pás no dame inklui fó konfiansa ba sistema iha Timor-Leste.
Vise Ministru Fortalesimentu Instituisionál, Paulo Remedios, hateten, Governu autoridade Munisipál Baucau organiza semináriu nasionál oinsá atu fó edukasaun sívika ba sidadaun sira, liuliu joven nune’e prevene konflitu, promove pás no dame iha sosiedade inklui oinsá konsensializa sidadaun atu kontinua tau konfiansa ba sistema justisa iha Timor-Leste.
Semináriu ne’ebé realiza iha Baucau ne’e partisipa husi Prokuradór Jerál Repúblika, Prezidente Komisaun Nasionál Eleisaun, Autoridade Munisipál Baucau, envolve mós diresaun kargu xefia, vereranu no reprezentante relijioza sira.
“Ho objetivu atu eduka ita-nia joven sira oinsá mak bele hakribi violénsia iha komunidade no partisipa ativu prosesu dezenvolvimentu,” Paulo informa ba Tatoli hafoin partisipa semináriu nasionál loron ida ne’ebé organiza husi Vise-Ministru Fortalesimentu Instituisionál, Paulo Remedios, ne’ebé iha otel Benfica, Baukau, segunda ne’e.
Nia hatutan, objetivu prinsipál ida husi semináriu ne’e mak oinsá fó hanoin ba dirijente kargu xefia iha munisípiu Baucau atu hato’o komunidade sira, liliu oinsá hatene kona ba servisu atendimentu Billete Identidade iha servisu Rejistu Notariadu no Servisu Terras Propriedade.
“Hanesan sidadaun saida mak sira bele halo no sira labele halo liga ba diretu síviku no polítika atu nune’e bele partisipa ativu iha prosesu dezenvolvimentu ne’e ho di’ak no nafatin tau konfiansa ba ita-nia seitór justisa.”
“Edukasaun ba joven sira-ne’e importante tanba Governu iha kompromisu atu kontinua fó eduksaun sívika ba joven sira, tanba ne’e ohin ita hamutuk iha-ne’e fó hanoin ba dirijente sira atu fila-fali ba idak-idak nia fatin, atu fó eduksaun ba joven nune’e hasa’e sira-nia abilidade hodi hakribii violénsia no fó solusaun ba problema ne’ebé akontese iha sira-nia fatin,” nia katak.
Prokuradór Jerál Repúblika, Nelson de Carvalho, realsa, inisiativa ne’ebé Governu halo ne’e di’ak nunee husi entidade sira apoia joven sira liuhusi fó eduksaun sívika hodi kontribui ba konstrusaun Estadu Timor-Leste nian.
Nia husu joven sira tenke hanoin ba futuru no ne’e mak importante atu dudu hanoin sira-ne’e mak autoridade munisipál sira, nune’e lori joven sira ba dalan loos.
Reprezentante Prezidente Autoridade Munisipiu Baucau atuál Sekretáriu Munisipál Baucau, Eduardo Ximenes, hateten kominidade Baucau la hanesan uluk.
“Baucau ne’e ha’u bele hateten uluk la hanesan agora, ita haree foin dadaun Governu muda komunidade sira husi merkadu antigu ba merkadu foun ne’e, sira koopera di’ak, ida-ne’e hatudu komunidade Baucau hahú mentalidade tanba ne’e edukasaun sívika ida ne’e sé bele kontinua nafatin,” nia husu.
Nune’e mós Prezidente Komisaun Nasionál Eleisaun, Agostinho Belo, hateten, eduksaun sívika nu’udar fatór importante ba sidadaun sira oinsá sira bele ezerse sira-nia direitu síviku no hanesan sidadaun.
Nia dehan, atividade ne’ebé Governu liuhusi Vise Ministru Asuntu Fortalesimentu Instituisionál Paulo Remedios halo ne’e di’ak tebes tanba liuhusi dirijente sira iha Baukau hodi fó hanoin nafatin ba sidadaun hotu kona-ba sira-nia direitu no devér sira.
“Sosializasaun sira-ne’e importante tanba ita hatene ita-nia povu barak mak seidauk hatene kona-ba eleisaun, sira atu halo saida ba iha parte lei nian, karik mosu disiputa rai, saida mak sira halo tanba ne’e mak ha’u dehan inisiativa ne’e di’ak no kapaas tebes,” nia hateten.
Komandante PNTL Munisípiu Baucau, Superintendente Polísia Joao Sancho Pires, esplika, semináriu ne’e importante tanba bele fó hanoin ba polísia sira atu kontinua halo aprosimasaun ba joven sira oinsá joven bele iha mentalidade pás hodi kontribui trankuilidade iha sosiedade.
Nune’e mós Padre Evaristo António da Costa hateten, eduksaun sívika ba joven ne’e presiza nafatin nunee atu lori joven ba dalan loos.
Nia husu ba Governu labele utiliza joven sai hanesan instrumentu ba interese, fó eduksaun sívika tenke mai ho intensaun ne’ebé di’ak nune’e bele muda mentalidade joven nian.
Jornalista: Natalino Costa
Editór: Evaristo Soares Martins
