OJE 2026, MESSK husu adisionál millaun $2.7
DILI, 05 Agostu 2025 (TATOLI)–Ministériu Ensinu Superiór, Siénsia no Kultura (MESSK) akompañada husi instituisaun tutelada sira, Tersa ne’e, aprezenta planu, programa no proposta orsamentu ministériu nian ba Komité Revizaun Orsamentu (KRO) hodi husu adisionál.
“Tetu orsamentu jerál Estadu (OJE) ba MESSK tinan 2026 ho valór millaun $4.9 bazeia ba pakote fiskál ne’ebé atribui hosi Ministériu Finansa. Maibé, orsamentu ne’e la kobre hotu programa prioridade sira MESSK nian, nune’e husu tan orsamentu adisionál millaun $2.7,” Ministru Ensinu Superiór Siénsia no Kultura, José Honório da Costa Pereira Jerónimo dehan ba jornalista sira iha Auditóriu Ministériu Finansa, Aitarak-Laran.
Instituisaun sira-ne’ebé tula ba MESSK kompostu husi Ajénsia Nasionál Avaliasaun Akreditasaun no Akadémika (ANAAA), Institutu Nasionál Siénsia no Teknolojia (INCT), Universidade Nasionál Timor Lorosa’e (UNTL) no Institutu Politékniku Betanu (IPB).
“Ita husu tanba osan la to’o, tanba ita-boot sira hatene MESSK la’ós hanesan ministériu baibain, maibé ministériu reguladór. Ita presiza halo kontratasaun ba peritu sira mai halo avaliasaun ba kursu sira no ita tenke iha edifísiu foun. Tanba ne’e, ministériu husu adisionál millaun $2.7 maibé seidauk iha resposta,” Jose Honório haktuir.
Notísia relevante: KM aprova proposta MESSK ba kriasaun Intitutu Politékniku Timor-Leste
Nia afirma ohin seidauk iha rezultadu finál, tanba membru KRO sira husu ministériu atu hadi’a no ajusta filafali planu, depoiz mak sei mai fali aprezenta.
“Ami-nia aprezentasaun hotu di’ak, maibé iha buat balun ne’ebé presiza ajusta no haree halo didi’ak relasiona ho planu sira ho adisionál ne’ebé kada instituisaun husu,” nia akresenta.
José Honório hatutan MESSK mós husu kapitál menór tanba sasán elektrónika no transporte sira-nia kondisaun ladi’ak no mós husu kapitál dezenvolvimentu atu halo konstrusaun ba cobe house sira.
Aleinde ne’e, nia dehan, planu prioridade ministériu nian mak oinsá halo fiskalizasaun, monitorizasaun ba ensinu superiór no halo fiskalizasaun ba kursu sira-ne’ebé iha instituisaun superiór sira.
Entretantu, ezekusaun orsamentu Ministériu Ensinu Superiór, Siénsia no Kultura nian ba tinan 2025 nian atinje ona 60%, ne’ebé ekivale ho montante millaun $4.
Jornalista : Osória Marques
Editora : Julia Chatarina
