DILI, 06 Agostu 2025 (TATOLI)–Embaixada Portugal iha Timor-Leste estabelese sala ida ho naran Prezidente Ramos-Horta, ne’ebé sala referidu inaugura direita husi Prezidente Repúblika (PR), José Ramos-Horta.
“Ha’u agradese ba Embaixadora Portugal iha Timor-Leste ne’ebé deside halo fatin ida-ne’e, didikadu ba luta diplomasia hodi fó naran sala José Ramos-Horta,” Xefe Estadu hateten ba jornalista sira iha edifisiu Embaixada Portugal iha Dili, Kuarta ne’e.
Iha oportunidade ne’e, PR rekoñese Portugal ninia kontribuisaun iha diplomasia durante ne’e ba Timor-Leste.
“Maibé ha’u dehan Timor-Leste deve buat boot ba Portugal, liuliu Portugal nia diplomasia hodi tulun ita-nia luta,” Ramos-Horta tenik.
Notísia relevante : PR Horta dezloka bá Indonézia hodi hametin diplomasia akadémika
Maski nune’e, nia admite ema hotu iha rai-laran no rai-li’ur fó kontribuisaun ba Timor-Leste nia luta ba libertasaun.
“Ita-nia luta ne’e la’ós ema ida rua de’it, maibé ha’u hala’o ha’u-nia serbisu iha rai-li’ur, halo diplomasia maibé iha rai-laran mós halo luta ne’ebé maka’as iha rezisténsia,” Xefe Estadu tenik.
Jornalista : Hortencio Sanchez
Editora : Julia Chatarina
