VIKEKE, 11 Agostu 2025 (TATOLI)—Ministériu Agrikultura Peska, Pekuária no Floresta (MAPPF) hamutuk ho Prezidente Autoridade Munisipál Vikeke, Segunda ne’e, kolleta hare variedade nakroma ektare 58 iha Aldeia Buanurak, Suku Uabubu, Postu Administrativu Ossú, Munisípiu Vikeke.
Iha serimónia kolleta ne’e, reprezentante Ministru Agrikultura Peska, Pekuária no Floresta (MAPPF) atuál Diretór Jerál Kafé Planta no Indústria, Martinho Laurentino Soares haktuir serimónia kolleta hare variedade nakroma hamutuk ektare 58 ne’ebé implementa ne’e uza Sistema Pratika Agrikultura Di’ak (PAD) ho rezultadu ne’ebé di’ak.
“Ohin ita hamutuk ho ita-nia agrikultura sira hodi kolleta hare nakroma iha natar Futudu, Buanurak ne’ebé abandonadu kuaze tinan naruk. Nune’e, iha tinan ida-ne’e mak MAPPF apoia hadi’a irrigasaun, tratór halai natar no apoia fini ba agrikultór sira kuda,” Martinho Laurentino Soares hateten ba jornalista sira hafoin ramata kolleta hare iha natar Futudu.
Notísia relevante: MAPPF Viqueque kuda tan hare nakroma iha natar ektare 200
Martinho aprofunda katak natar ne’e halo hetan asisténsia husi estensionista sira hamutuk ho agrikultór sira hodi implementa PAD ho rezultadu hare mós di’ak tebes.
“Ita haree hare di’ak, ne’ebé ita-nia agrikultór sira la presiza ona sosa foos. Ne’ebé, ha’u hanoin programa MAPPF nian ba hasa’e produsaun di’ak tanba ajuda ita-nia agrikultór halo natar. Tan ne’e, bá-oin ita-nia agrikultór sira nafatin halo natar hodi prodús hare atu labele dependente ba foos importasaun husi rai-li’ur. Ida-ne’e mak polítika Governu nian. MAPPF sei kontinua apoiu ita-nia agrikultór sira hodi halo natar,” nia hato’o.
Iha fatin hanesan, Prezidente Autoridade Munisipál Vikeke, Francisco C. S de Gonzaga Soares informa katak rezultadu hare Futudu di’ak ne’ebé fó ona esperansa ba agrikultór hodi halo natar ba sustentablidade ai-han iha Munisípiu Vikeke.
“Natar Futudu kauze abandonadu tinan 11, depoiz ami halo normaliza ba irrigasuan, entaun ita-nia agrikultór sira hahú halo sira-nia natar. Ho rezultadu hare ne’ebé iha bele motiva ona ita-nia agrikultóra sira. Tan ne’e, ita hakarak haree hotu ba bem estar povu nian. Nune’e, iha tempu badak ha’u sei organiza juventude sira husi postu lima hodi ba haree toos sira iha Munisípiu Vikeke,” nia akresenta.
Iha biban hanesan, reprezentante agrikultór Buanurak, Manuel Afonso da Costa Guterres sente kontente tanba progresu hare ba époka ne’e rezultadu di’ak tanba hetan tulun husi servisu MAPPF Vikeke.
“Ami sente kontente tanba iha tinan ida-ne’e ami bele kolleta hare ho rezultadu ne’ebé di’ak. Durante ne’e, SMAPPF Vikeke apoia maka’as ami hanesan tratór halai natar, fini no adubu orgániku. Tanba ne’e mak rezultadu hare di’ak. Nune’e, bá-oin ami nafatin husu MAPPF hodi nafatin akompaña ami no motiva ami hodi halo natar,” nia tenik.
Partisipa iha serimónia kolleta hare hetan akompaña husi veteranu, Komandante Polísia Nasionál Timor-Leste (PNTL) Munisípiu Vikeke, Autoridade Postu Ossú no komunidade agrikultór.
Jornalista: Vitorino Lopez da Costa
Editór: Xisto Freitas da Piedade
