OEKUSI, 12 Agostu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Sekretária Rejionál ba Asuntu Agrikultura, apoia fasilidade ba grupu peskadór Banoi husi suku Nípani sub-rejiaun Pante Makasar hanesan rompon hodi monta iha tasi klaran, atu hamaus ikan oinsá bele kolleta ikan.
Notísia relevante:Agrikultura sei harii rompon 15 fasilita peskadór sira iha Pante Makasar-Nítibe
Sekretária Rejionál ba Asuntu Agrikultura, Filomena Sila, informa, objetivu husi fasilidade rompon ne’e, primeiru atu atu limita área operasaun no mós limita gastu ba operasaun bainhira hala’o kna’ar buka ikan hanesan peskadór.
“Objetivu monta rompon ida-ne’e, atu habadak área operasaun nian, tanba durante ne’e, ita-nia grupu peskadór ne’e, buka ikan iha tasi laran ho área ne’ebé luan tebes, no gasta tempu barakliu kompara ho rezultadu ladun balansu, ezemplu sira sai dadeer to’o lorokraik dalaruma la hetan ikan ou hetan maibé ladun barak, entaun ho ekipamentu rompon ne’ebé ohin ita hatama ba tasi atu hamaus ikan no hatama, atu fasil bele kolleta ho lalais,” nia esplika iha sentru Lotas ne’ebé lokaliza iha bairru Oésono suku Costa sub-rejiaun Pante Makasar.
Nia esplika, durante tinan barak, peskadór sira gasta tempu ho fíziku, tanba tenke hean bero to’o parte loromonu to’o lorosa’e besik fronteira nian, tan ne’e iha 2024 Diresaun Rejionál Agrikultura propoin iha Planu Asaun Anuál (PAA) 2025, atu fasilita grupu sira ho fasilidade rompon ne’e.
“Ita foin mak implementa polítika ne’e grupu ida-ne’e, ne’ebé ba oin ita haree nia progresu no rezultadu, tanba fasilidade rompon ne’e nia gastu ladun barak, rihun $1.425, atu kompra materiál lokál no materiál fabrikadu,” nia informa.
Kona-ba seguránsa nian, atu asegura fasilidade ne’e iha área marítima nian ka tasi klaran, parte Diresaun Rejionál Agrikultura, sei submete karta koñesimentu ba Prezidente Autoridade RAEAO hodi hetan apoi seguransa husi komando nian.
“Tanba rompon ne’e iha tasi klaran, entaun presiza mós informa ba komandu F-FDTL komponente Navál destakadu Oekusi no Polísia Unidade Marrítima (UPM) atu bele apoia mós, tanba maneira kolleta ikan ne’e, sei hala’o kada loron, agora ne’e hanesan ita halo ona luhan ida, entaun ita só ba kolleta de’it, lahanesan antes ne’e ita mak ba buka ikan, agora ita halo luhan,” nia esplika.
Notísia relevante:Peskadór sira iha Lifau Oé-Cusse husu tulun Governu apoia fasilidade
Xefe Grupu Peskadór Bauno, Marcos Coa, konsidera polítika ne’e tulun tebes peskadór sira atu oinsá bele kolleta ikan ho volume boot no hamenus, inklui hamenus gastu ba fíziku no tempu.
“Ami kontente tanba Governu apoia ami materiál sira kompletu halo rompon ne’e to’o hotu, ne’ebé ami-nia grupu iha ema na’in-ualu sei esforsa atu utiliza fasilidade ho responsabilidade, maibé ami rekomenda nafatin ba oin sosa ami redi atu oinsá bele kaptura ikan, luhan ami halo ona maibé nia ekipamentu atu kaptura ne’e mak seidauk iha,” nia hateten.
Notísia relevante:Peskadór Sira iha Oe-nis RAEOA Husu Merkadu ba Ikan
Jornalista: Abílio Elo Nini
Editór: Rafael Ximenes de A. Belo
