DILI, 19 Agostu 2025 (TATOLI)–Ministru Petróleu no Rekursu Minerál, Francisco da Costa Monteiro, informa, progresu konkursu públiku internasionál ba projetu Tasi-Mane daudaun iha ona faze avaliasaun téknika.
“Projetu Tasi-Mane, ba Suai Supply Base iha faze finál ona agora iha faze avaliasaun téknika atu ba loke ona komersiál nian, no ba auto estrada nian iha faze atu ba loke proposta tékniku nian, ne’ebé ita hotu akompaña prosesu sira ne’e,” Ministru Monteiro, hateten iha Farol, Tersa ne’e.
Tuir dadus provizóriu empreza 200 resin mak submete ona sira-nia proposta tékniku atu halo avaliasaun.
Ministru dehan, ekipa interministeriál kontinua halo hela levatamentu dadus ba komunidade afetadu.
“Fiar katak antes ramata tinan ne’e levatamentu dadus hotu ona, nune’e bele asina kontratu no iha inísiu tinan oin hahú halo pagamentu ona nune’e ba oin labele problema kona-ba ba rai laiha,” nia akresenta.
Notisía relevante : Projetu Tasi-Mane: Empreza submete proposta tékniku no finansiamentu iha Jullu
Tuir projesaun Governu nian, projetu autoestrada ho distánsia kilométru 76 sei fó impaktu diretu ba ekonomia lokál liuhusi kriasaun empregu entre 2.000 to’o 5.000 no benefísiu indiretu ba inisiativa empreendedora hanesan agrikultura, pekuária, otelária, konstrusaun no seluk tan.
Inisiativa neʼebé ezekutivu hakarak avansa mak empoderamentu ba foin-sa’e sira atu partisipa iha projetu estratéjiku ne’e ho koordenasaun direta ho autoridade lokál sira, la halo diskriminasaun no envolve joven iha munisípiu seluk, tanba Tasi-Mane hanesan projetu nasionál.
Iha konstrusaun auto-estrada seksaun dahuluk no komponente seluk husi Tasi-Mane, Governu prepara ona kuadru legál no mekanizmu própriu ba libertasaun rai ne’ebé inklui identifikasaun ba rai, uma no plantasaun, hafoin prosede ba preparasaun baze dadus, publikasaun ne’ebé permite no rezolusaun iha períodu kontestasaun determinadu no realiza kompensasaun.
Implementasaun mega projetu auto-estrada sei posibilita esforsu atu lori rekursu petrolíferu husi área offshore no onshore hodi prosesa iha Natarbora iha futuru, liuhusi konetividade autoestrada entre Suai Supply Base ba zona indústria petrolífera Natarbora no kondisaun infraestrutura hanesan aeroportu Suai, autoestrada hanesan baze ida ba esforsu nasionál atu alkansa dezenvolvimentu kampu Greater Sunrise.
Reuniaun Konsellu Ministru iha 07 Marsu 2025, autoriza Ministériu Petróleu no Rekursu Minerál halo despeza relasiona ho programa kona-ba implementasaun Projetu Tasi-Mane iha Kosta Súl nasaun nian ho montante $40.500.000.
Jornalista : Arminda Fonseca
Editora : Julia Chatarina
