“La’ós de’it selebrasaun ba ita-nia pasadu, maibé reafirmasaun ida ba ita-nia kompromisu harii futuru ida ne’ebé di’ak liu ba timoroan tomak”, Falur hato’o nia mensajen ba komemorasaun loron FALINTIL iha Kuartél Jenerál F-FDTL, Fatuhada, foin lalais ne’e.
Nia dehan tema sentrál ba komemorasaun tinan-ne’e mak habelar timoroan nia dame ba mundu tomak. “Reflete jornada ne’ebé lori ita hotu mai to’o iha ne’e, FALINTIL reprezenta la’ós de’it hanesan organizasaun militár ida, nia enkarna iha ita-nia Nasaun nia espíritu”.
Falur realsa, espíritu ida ne’ebé harii iha ita-nia luta, sakrifísiu no determinasaun ne’ebé la nakdoko. “Nune’e subtema ne’ebé ita hili, FALINTIL no identidade nasionál, harii karáter Nasaun ida nian, fó hanoin mai ita katak ita-nia identidade husi ita-nia istória no aspirasaun sira”.
Nia subliña FALINTIL hala’o ona papél krusiál ida hodi estabelese valór sira ne’ebé define iha reziliensia no unidade kompromisu ba dame.
Notísira relevante: “FALINTIL fó buat hotu ba povu”
Jornalista : Nelson de Sousa
Editora : Rita Almeida
