DILI, 20 Agostu 2025 (TATOLI)—Veteranu no atuál Prezidente Konsellu Kombatente Libertasaun Nasionál (CCLN, sigla portugés), Vidal de Jesus “Riak Leman” konsidera FALINTIL mak fatór determinante ba Timor-Leste nia ukun rasik-an.
Notísia Relevante: Komemora loron FALINTIL ba da-50 nu’udar reafirmasaun ba kompromisu harii futuru
Nia hatutan, loron Frente Armada Libertasaun Nasionál Timor-Leste (FALINTIL) ne’e loron boot no loron importante ba FALINTIL sira tanba ezisténsia FALINTIL mak funu ne’e iha husi inísiu tinan 1975 to’o tinan 1999.
“Ha’u atu dehan de’it katak FALINTIL ne’e hanesan fatór determinante ba ukun-an. Se frente armada laiha, ita sei la manán funu, hanesan mós Frente Klandestina no Frente Diplomátiku laiha mós ita la manán funu,” Veteranu ne’e hateten ba Agência Tatoli ihafoin seremónia isar bandeira iha Tasi-Tolu, ohin.
Tanba ne’e, nia apela ba jerasaun foun ka joven sira, di’akliu rona malu no koopera ho Estadu no Polísia sira, nune’e ita bele selebra loron FALINTIL la’o ho hakmatek, tanba loron sira hanesan ne’e loron istóriku ba nasaun nian.
“Joven sira tenke banati tuir eroi sira-ne’ebé mate tanba rai ida-ne’e, nune’e jerasaun foun tenke kontinua dezenvolve rai ida-ne’e,” nia hateten.
Nia haktuir, atividade militár iha tempu rezisténsia ne’e durante tinan 24, no gerillia sira uza de’it arma J3 ne’ebé Portugés sira rai hela ba sira, maibé liu tiha tinan ida ka rua arma ne’e mós la funsiona no bala musan mós laiha ona, entaun sira iha estratéjia hodi asaltu inimigu Indonézia sira no hadau sira-nia arma hodi kontinua halo funu to’o ramata.
“Tanba ita laiha tan dalan seluk, kuaze dezafiu barak mak ami enfrenta durante funu hanesan, hahán laiha, to’os mós laiha, naran konsumu ai-tahan fuik sira, sorte di’ak hetan kumbili hodi auguenta moris iha funu laran,” nia haktuir.
Maibé, nia dehan, membru F-FDTL barak mak mai husi FALINTIL nia ema, aleinde ne’e forsa armada sira mós mantein ka destaka iha fatin-fatin hanesan iha fronteira terrestre no mariña nian, maske funu laiha ona.
“Ha’u hanoin agora funu sei la akontese tan tanba ita halo kooperasaun di’ak ho nasaun sira seluk liuliu Indonézia rasik,” nia dehan.
Nia husu ba Governu tenke prepara kondisaun nune’e bele promove di’ak liután FALINTIL- Forsa Defeza Timor-Leste (F-FDTL) sai profesionál liután iha prinsípiu lutu nasaun nian.
Notísia Relevante:“FALINTIL fó buat hotu ba povu”
Jornalista : Alexandra da Costa
Editór : Cancio Ximenes
