DILI, 22 Agostu 2025 (TATOLI)-Komisaun Anti-Korrupsaun (CAC, siglá portugés) iha proposta Orsamentu Jerál Estadu (OJE) 2026 husu adisionál rihun $700-resin iha reuniaun Komité Revizaun Orsamentu (KRO).
Komisáriu Rui Pereira hateten sira prepara ona planu, programa no atividade sira maibé tetu orsamentu tinan-oin la sufisiente atu kobre nesesidade sira.
Nune’e pedidu adisionál ne’e atu rekruta asesór internasionál na’in-ida apoiu serbisu investigasaun kriminál, asesór nasionál na’in-rua apoiu gabinete komisáriu ho diresaun kooperasaun ho enjiñeiru nasionál-ida, no sosa ekipamentu informátiku; komputadór, laptop, karreta unidade ha’at ho seluk tan.
“Maibé ida-ne’e desizaun fila-fali ba Prezidente ho membru KRO atu tau iha konsiderasaun”, Rui dehan ba jornalista sira hafoin aprezenta proposta OJE 2026 KAK nian ba KRO iha edifísiu Ministéiru Finansa, sesta-ne’e.
Pedidu ne’e presiza konsiderasaun hodi apoiu serbisu instituisaun ne’e la’o di’ak liután. Nia dehan tetu ne’ebé simu husi Ministéiru Finansa ba tinan-oin millaun $1.6, ho prioridade programa kontinua halo investigasaun ba krime korrupsaun no prevensaun.
Enkuantu, OJE 2025 ba KAK hetan alokasaun millaun $1-resin daudaun ezekuta ona pursentu 54.
Notísia relevante: KAK hamutuk ho instituisaun Estadu dezenvolve ENAK hodi prevene korrupsaun
Jornalista : Nelson de Sousa
Editora : Rita Almeida
