DILI, 27 Agostu 2025 (TATOLI)-Portavós Polísia Sientífika Investigasaun Kriminál (PCIC, sigla portugés), Mario Tavares, hateten liuhusi servisu hamutuk ho komunidade intelejénsia konsege detein suspeitu na’in-10 ba krime jogu ilísitu no burka informátika iha Rejiaun Administrativa Espesiál Oekusi Ambenu (RAEOA).
“PCIC ho entidade sira ne’ebé servisu hamutuk prepara hela atu aprezenta suspeitu na’in-10 ba prosesu”, Tavares hateten ba jornalista iha konferénsia imprensa ne’ebé halo iha edifisiu PCIC Kolmera, kuarta ne’e.
Tavares dehan suspeitu sira ne’e ekipa detein ho flagrante delito, tanba habosok ema hodi transfere osan ba sira.
Tavares haktuir identifikasaun no apreensaun ne’ebé PCIC halo ba krime jogu ilísitu mak desktop hamutuk 87, laptop hamutuk-13, telefone 194, akses point Wifi ida, starlink router rua, sim card telemovél hamutuk 135, ne’ebé apoiu husi operadór telemovel balun iha Timor–Leste ba krime jogu ilísitu.
Enkuantu ba krime burla informátika PCIC konsege halo apreensaun ba desktop hamutuk 54, laptop haat, headphone hamutuk 53, access point hamutuk rua, telemovel hamutuk 44, mákina sura osan ida, no impresora ida.
Nia hatutan fatin esplorasaun jogu PCIC hetan operadór ka serve boot ne’ebé instala iha ne’ebá no funsionariu sira uza hodi habosok ema, liuliu krime burla informátika ne’ebé la’o iha facebook ho modu operasaun katak ita-boot sira ba lalais lotariu, tanba ita-boot sira-nia númeru hetan prémiu no iha aviza ida katak ami sei oferese prémiu osan no karreta.
Nia dehan, dala-barak husu ema nia dadus pesoál, fó alerta dehan iha situasaun urjente iha ita boot sira nia konta watshapp no konta banku nian ne’ebé favór ida dijitaliza ita-boot sira-nia seña. Kuandu husi buat sira ne’e la-loos tanba banku ka entidade finanseiru nunka husu ita boot sira-nia seña.
“Aproveita oportunidade ne’e husu ba públiku relasiona ho online scanning hanesan seguransa dijitál ba ita-boot sira-nia konta, depende ba ita-boot sira-nia atuasaun”, katak nia.
Nia hatutan fatin esplorasaun jogu iha Oekusi ne’ebé PCIC ho komunidade intelenjia halo identifikasaun prosesu la’o hela, nune’e PCIC iha prazu loron-lima atu konklui.
“Agora dadaun ekipa iha hela terenu, kontinua halo dilijensia hodi arrola faktu balun tan molok aprezenta ba autoridade kompetente iha RAEOA hodi kontinua prosesu”, tenik nia.
Mário Tavares lakohi fó sai nain ba fatin esplorasaun jogu ilísitu no na’in ba fatin halo online scanning, tanba ne’e parte husi segredu justisa.
Nia dehan tan fatin ne’e emprega Timor oan hamutuk 100.
Notísia relevante: PSIK ho SNI buska apreensaun no desmantela jogu online ilegál iha Oekusi
Jornalista : Natalino Costa
Editora : Rita Almeida
