Emprezáriu Krisna Bali fahe esperiénsia kona-ba transforma dezafiu sai oportunidade

DILI, 29 Agostu 2025 (TATOLI) – Emprezáriu susesu ida husi Indonézia, Ajik Krisna, marka prezensa iha Expo Internasionál Komérsiu Dili (DITE) 2025, hodi fahe nia istória inspiradora no estratéjika sira harii negósiu no apoiu ba Mikro Pekena no Médiu Empreza (MPME) sira liuhusi talk show.

Gusti Ngurah Anom, koñesidu liu ho naran Ajik Krisna, moris iha loron 05 fulan-Marsu tinan 1971, iha Bali. Nia maka emprezáriu susesu ida no fundadór Krisna Oleh-Oleh Bali ne’ebé iha koneksaun boot iha illa Dewata Bali.

Ajik haktuir nia viajen moris nian ne’ebé nakonu ho dezafiu hamutuk ho nia kaben no kolega eskola pré-sekundária ne’ebé mós mai husi família simples, sira deside hakarak halo mudansa ba moris muda Tangguwisia ba Denpasar lahó lisensa husi nia inan-aman no laiha osan ruma iha bolsu.

Iha Sanur, Denpasar, Ajik hetan lisensa rezidénsia husi guarda seguransa ótel nian no toba iha postu seguransa nian durante tinan rua.

Durante tempu neʼebá, nia serbisu makaʼas hodi hamoos kintál, jardín, no fase karreta turista sira husi rejiaun oioin. Nia rai nia rendimentu loroloron Rp 2,000–5,000 hodi sosa motór ida, kapitál inísiu hodi kontinua nia moris no buka oportunidade sira ne’ebé boot liu.

“Ha’u apreende buat hotu husi zero. Laiha buat ida maka fásil, maibé ha’u-nia determinasaun atu hetan susesu halo ha’u labele rende”, Ajik konta.

Hafoin ne’e nia halo serbisu iha fábrika vestuária ida, Ajik domina abilidade sira kona-ba suku, serigrafia, no tesi hena. Husi ne’ebá, nia hahú nia negósiu rasik iha tinan 1990.

“Am-nia negósiu vestuáriu nian buras lalais, no iha 2007, ho ferikoan loke loja Krisna Oleh Oleh [lembransa] dahuluk iha Denpasar, ami-nia alvu mensál fa’an dahuluk tarjetu ho Rp 300 juta, maibé liu espetativa, atinje Rp1 miliar”, nia dehan.

Nia relata katak ho rezultadu ne’e, espansaun kontinua outlet daruak loke iha 2008, terseiru iha 2009, no iha 2010, Rama Krisna loke, nu’udar loja boot Oleh Oleh Bali dahuluk oras 24, pioneiru ida iha Sudeste Aziátiku. Krisna agora iha loja (outlet) 41 iha Bali no Yogyakarta, emprega ona ema 2,500, no apoia Mikro, Pekena no Médiu Empreza lokál 475.

Iha talk show ne’e, Ajik subliña filozofia negósiu nian ne’ebé sai hanesan xave ba nia susesu, inklui independénsia no serbisu maka’as, hodi permite nia atu aprende husi zero, mak konsentra, no minimiza husu opiniaun barak, nune’e mantein hanoin ne’ebé pozitivu.

Nia mós subliña atu sai susesu nafatin tuir prosedimentu Governu lokál no legál hotu, husi lisensa to’o administrasaun. No tenke apoiu salidariedade ba maluk sira ne’ebé presiza no haburas relasaun ho funsionáriu sira no ema hothotu.

Nia akresenta katak atu sai emprezáriu tenke kompreende inovasaun no adaptasaun hodi nakfilak dezafiu sira ba oportunidade, ezemplu, durante pandemia, Krisna lansa fa’an online no kria produtu emblemátiku foun sira.

“Iha Bali, ha’u ajuda Governu, la’ós kontráriu. Ita nu’udar sidadaun tenke iha konxiénsia kona-ba ita-nia kontribuisaun ba dezenvolvimentu ita-nia rejiaun nian. Hamenus husu opiniaun, book an lalais, no labele neineik atu responde”, Ajik subliña.

Nia konta iha 2025, Ajik Krisna harii hela aldeia Mikro, Pekena no Médiu (MSME, sigla Indonézia), ida ho luan ektar 23, ne’ebé sei sai hanesan sentru kriativu ida ba emprezáriu lokál no turista sira. Nia mós dezenvolve hela Coffee Shop no restaurante ida iha Kintamani, hodi kombina Bali nia beleza naturál ho kulturál no hahán lokál.

“Ha’u mantein envolve ha’u-nia an iha serbisu sira hanesan dasa rai no hamoos. Ida ne’e ha’u-nia prinsípiu katak susesu la’ós de’it ba ita-nia an rasik, maibé mós ba komunidade no funsionáriu sira ne’ebé apoia ha’u. Ha’u-nia susesu la’ós de’it tanba ha’u ho ha’u-nia feen, maibé tanba serbisu maka’as husi ha’u nia funsionáriu sira no orasaun husi povu Bali nian,” Ajik realsa.

Jornalista : Arminda Fonseca

Editora : Maria Auxiliadora