DILI, 31 Agostu 2025 (TATOLI)—Prezidente Repúblika (PR), José Ramos-Horta, Domingu ne’e, lansa instalasaun foun kafetaria Kafé Atsabe, ne’ebé lokaliza iha Kristu Rei, Dili.
Ramos-Horta iha biban ne’e agradese ba Governu tanba bele oferese ona fatin ne’e ba na’in Kafé Atsabe, Mariano ‘Ameta’ da Costa, hodi halo negósiu.
“Ohin loron ha’u labele ko’alia buat barak maibé hato’o de’it parabéns ba na’in ba Kafé Atsabe,” Prezidente Repúblika hato’o.
Notísia relevante : Kafé Atsabe loke fali ba públiku hafoin hetan despezu administrativu
Iha fatin hanesan, Na’in ba Kafé Orgánika Atsabe Ermera, Mariano ‘Ameta’ da Costa, hateten, antes ne’e halo ona negosiasaun ho Governu.
“Ami hetan fatin ne’e tanba hafoin hetan eviksaun iha Fomentu II, ami halo negosiasaun ho Governu no entrega fatin ne’e mai ami hadi’a kuaze fulan-tolu, ohin konsege halo grand opening,” Ameta tenik.
Nia dehan, fatin ne’ebé Governu entrega ne’e di’ak tanba hanesan fatin públiku no kafekultór sira mós kontente tanba fatin iha ona, nune’e ba oin sira-nia kafé sei folin tanba Kafé Atsabe sosa direita husi kafekultór sira.
Iha kafetaria foun, folin ba bebida hahú husi $1 to’o $5 no han nian hahú husi $5 to’o $12, oras loke hahú husi tuku 07:00 dadersaan to’o 00:00.
Kafé Atsabe rasik iha ninia sukursál hamutuk haat no tuir planu atu loke tan iha Ermera no Likisá. Totál traballadór ne’ebé serbisu agora hamutuk 27.
Governu liuhusi ekipa konjunta oha loron 03 Janeiru 2025, halo despeju administrativu ba Kafé Atsabe ho andar tolu, ne’ebé lokaliza iha Fomentu II, tanba konsidera iha área risku ba dezastre, besik mota.
Jornalista : Arminda Fonseca
Editora : Julia Chatarina
