Zé Pedro anúnsia lista jogadór na’in-26 prepara tuir kompetisaun kualifikasaun Asian Cup

DILI, 02 Setembru 2025 (TATOLI)—Treinadór Prinsipál Selesaun Nasionál Timor-Leste, José Pedro Alves Salazar (Zé Pedro) anúnsia ona lista jogadór hamutuk na’in-26 ne’ebé selesionadu hodi kompete iha kualifikasaun Asian Cup 2027.

Jogadór na’in-26 foti liuhusi klube, Liga Futeból Timor-Leste (LFTL) no timoroan ne’ebé domisiliáriu iha diáspora.

Husi númeru ne’e, Treinadór Prinsipál Zé Pedro sei liuhosi prosesu selesaun ne’ebé fahe ba grupu rua. Dahuluk, sei halo selesaun durante loron hitu hanesan treinu preparasaun. Faze daruak sei kontinua halo selesaun durante loron hitu.

“Sei halo konvokatóriu lista finál ba ekipa ho ema na’in-23 hodi kontinua ba hala’o Training Camp (TC) iha Darwin-Austrália,” hakerek nota imprensa ne’ebé TATOLI asesu, Tersa ne’e.

Notísia relevante: Treinadór Zé Pedro sei halo preparasaun ba jogu kualifikasaun AFC Asian Cup 2027

Tuir planu, hafoin ramata selesaun, ekipa Lafaek sei kontinua hala’o jogu FIFA Friendly Match iha Darwin-Austrália antes ekipa selesaun nasionál hala’o jogu ofisiál kontra Filipina iha estádiu Darwin iha loron-09 Outubru 2025.

Zé Pedro relata razaun ba modelu selesaun ne’ebé mak treinadór halo ho objetivu hakarak haree no akumula loloos talentu, kapasidade, abilidade futebolista ne’ebé mak Timor-Leste iha no tau mós importánsia ba atitude jogadór sira-nian atu hetan kualidade jogadór ne’ebé prenxe rekizitu hodi reprezenta ekipa nasionál Timor-Leste.

Timor-Leste rasik sei iha jogu haat iha kompetisaun kualifikasaun AFC Asian Cup 2027 iha-ne’ebé koloka hamutuk ho nasaun tolu seluk hanesan Filipina, Tazaskistaun no Maladewa iha-ne’ebé ekipa Lafaek okupa opozisaun datoluk tabele klasifikasaun ho pontu 3, rezultadu husi jogu rua, manán (M) 1 no lakon (L) 1.

Entretantu, tuir oráriu Timor-Leste sei hala’o jogu volta dahuluk kontra Filipina iha loron-09 Outubru no volta daruak iha loron-14 Outubru. Enkuantu, jogu tolu seluk sei kontra Tazaskistaun iha loron-18 Novembru no jogu ikus kontra Maladewa iha 31 Marsu 2026.

Tuirmai lista jogadór na’in-26 ne’ebé anunsiadu ona hanesan Pablo de Jesus (Ponta Leste), Alexandre Quintão (Emanuel FC), Natalino Soares (Ponta Leste), Adérito Pereira (DIT FC), Lesi Atok (Akadémika FC), Fernando Carvalho (AD. SLB Laulara), Filomeno da Costa (AD. SLB Laulara), Emidio da Costa (AD. SLB Laulara).

Juvito Moniz (Emanuel FC) , João Soares ( Karketu Dili FC), Francisco da Costa (Karketu Dili FC), Abílio Jerónimo (Assalam FC), Ryan Jom (Austrália), Santiago da Costa (Karketu Dili FC), Kornelis Nahak (AD. SLB), Aldo Amaral (Coração FC).

Amancio Araújo (Emanuel FC), Edencio Soares (AD. SLB), Jardel Piedade (Portu Taibessi), Marques de Carvalho (AD. SLB), Xavier Bait (DIT FC), Mouzinho de Lima (AD. SLB), Elias Mesquita (Ponta Leste), Orcelio (AD. SLB), Lazario (Coração FC) no José Almeida (DIT FC).

Jornalista: Natalino Belo

Editór: Xisto Freitas da Piedade