VIKEKE, 06 Setembru 2025 (2025) – Autoridade lokál Postu Administrativu Ossu, Munisípiu Vikeke, idenfika ona fatin rua hodi harii jardín eroi hodi halot restu mortál martir sira ne’ebé luta ba independénsia Timor-Leste.
“Atu harii jardín eroi ba martir sira ne’e ita idenfika ona fatin rua, tanba ita hotu hatene distánsia entre suku sira dok malu. Tanba ne’e, ita iha fatin rua hodi hafásil família sira lao besik”, Administradór Postu Administrativu Ossu, José da Silva Monteiro, hatoo ba TATOLI, iha marjen serimónia ofisiál entrega rai ba Governu ne’ebé realiza iha Suku Uiabobo, Sabádu ne’e.
Tuir líder lokál, área rua identifikada ona mak hanesan: Louhunu Lukawa ne’ebé sei harii jardín eroi ba martir sira husi Suku Ossu de Cima, Suku Ossorua, Suku Uagia, Suku Louhunu, Suku Larigutu, Suku Liaruka no Suku Builale, enkuantu área seluk identifikada mak Adai Soba ne’ebé komunidade lokál entrega ona ba Governu hodi halot restu mortál husi Suku Builo, Suku Nahareka Suku Uaibobo no Suku Uabubu.
José da Silva Monteiro mós dehan rai rua ne’ebé atu harii jardín eroi komunidade sira voluntariamente entrega ona ba Governu no sei la halo indemnizasaun ruma.
Notísia relevante: Komunidade Uaibobo entrega rai ba Governu hodi harii jardín eroi
Jornalista: Ivonia da Silva
Editora: Isaura Lemos de Deus
