VIKEKE, 08 Setembru 2025 (TATOLI)—Xefe Suku Irabin de Baixo, Postu Administrativu Uatukarbau, Munisípiu Vikeke, José Baptista do Carmo informa konstrusaun valeta iha Irabin de Baixo husi Programa Nasionál Dezenvolvimentu Suku (PNDS) besik konkluidu.
“Projetu PNDS ba tinan 2025 ami prioridade konstrui valeta ih Aldeia Lakoloro Hoo, tanba tempu udan bee sempre afeta komunidade nia uma inklui edifísiu eskola nian. Tan ne’e, ami tau ba planu PNDS hodi konstrui valeta distánsia purvolta metru 200, ne’ebé besik atu konkluidu obra,” José Baptista do Carmo ba TATOLI iha Postu Uatukarbau, Segunda ne’e.
José hatutan razaun deside konstrusaun valeta iha Aldeia Lakoloro Hoo tanba tempu udan uma-kain sanulu (10) no edifísiu eskola sekundária ida afetada ba inundasaun ka bee tama komunidade nia uma nune’e tempu udan bee labele tama.
Nia esplika sira konsege konstrui ona metru 120 no falta metru 80 nune’e badaen sira sei esforsu hodi finaliza obra referida iha tempu badak.
“Ha’u fiar iha fulan-Setembru ne’e ami-nia obra bele finaliza ona, tanba hela de’it ona metru 80. Ohin badaen sira labele serbisu tanba udan. Udan para sira sei kontinua serbisu para konklui obra,” nia akresenta.
Entretantu, obra referida hetan akompaña husi autoridade Suku Irabin de Baixo no apoia husi tékniku PNDS Postu Uatukarbau. Konstrusaun valeta ne’e aloka orsamentu hamutuk $31.399,31.
Jornalista: Vitorino Lopez da Costa
Editór: Xisto Freitas da Piedade
