OEKUSI, 18 Setembru 2025 (TATOLI) – Veteranu Jeferinu da Cruz Sa’u, eleitu nu’udar Komisáriu Konsellu kombatente Libertasaun Nasionál (CCLN), hodi reprezenta veteranu sira iha Rejiaun Administrativa Espesiál Oekusi Ambeno (RAEOA) ba nasionál ho mandatu tinan lima, hahú 2025 to’o 2030.
Kargu ne’ebé nia simu, liuhusi konferénsia munisipál daruak ho tema “Hametin Unidade ba Dezenvolvimentu Nasionál”, ne’ebé hala’o iha salaun igreja Numbei, kuarta horsehik no hetan partispasaun mai husi veteranu 194.
Notísia relevante:CCLN asina kontratu ho empreza BTK ba konstrusaun Banku Veteranu
Iha ámbitu eleisaun ne’e, kompete ho pakote rua mak hanesan pakote dahuluk A lidera husi Jeferinu da Cruz Sa’u nu’udar komisáriu, ho nia suplemente na’in-rua João da Costa no Fernando Sanauno, pakote B mak lidera husi Komisáriu Sesante José António Ote, ho nia supelementa Costancio Suni no José Tout Nautos.
Iha konferénsia CCLN munisipál iha Oekusi, lidera husi veteranu Luís de Jesus Neno, nu’udar Prezidente Meza ho nia Vise-Prezidente Meza mak Domingos de Almeida.
“Pakote A mak hetan votu barakliu hamutuk 97, no pakote B hetan votu 95, rezultadu hatudu ona, katak veteranu Jeferinu da Cruz Sa’u mak eleitu nu’udar komisáriu ba périodu tinan lima,” anúsia rezultadu votasaun husi Prezidente Meja Luís de Jesus Neno, ba audénsia sira iha salaun igreja Numbei.
Iha biban ne’e, Prezidente CCLN, Vidal de Jesus “Riak Leman” esplika, konferénsia ne’e, realiza kada périodu tinan lima, nu’udar reflesaun ba re-estruturasaun.
“Konferénsia ne’e, ami hahú uluk iha Munisípiu Lautein, agora to’o ona iha Oekusi. Ida-ne’e, ita realiza kada tinan lima, veteranu sira presiza halo reflesaun, ba ida ne’ebé mak di’ak no ladi’ak, no ida-ne’ebé preokupa ka la preokupa, entaun delegadu sira mak sei deside, maibé importante vetarnu sira kontribui ba pás, komprende malu, rona malu to’o remata”, nia apela iha salaun igreja Numbei.
Notísia relevante:MAKLN entrega hikas lista reklamasaun no kontestasaun 61.704 ba CCLN munisipál
Komisáriu eleitu, Jeferinu da Cruz Sa’u, orgullu bainhira hetan fiar husi delegadu hamutuk 194 ne’ebé depozita sira-nia konfiansa nu’udar Komisáriu CCLN Oekusi ba Nasionál, tan ne’e nia kompromete, durante mandatu tinan lima, tau matan másimu ba asuntu vetaranu nian.
“Programa prioridade ba ha’u-nia mandatu katak, ha’u sei tau prioridade uluk mak sei halo sosializasaun ba alterasun institutu komponente nian, entaun presiza hodi halo sosializasaun ba veteranu sira kona-ba artigu sira, segundu sei kordena ho atividade ka programa saida de’it iha veteranu nian,” nia promete.
Notísia relevante:CCLN simu ekipamentu saúde husi Veteranu Nova Zelándia
Entretantu, bazea ba livru 3-C Orsamentu Jerál Estadu (OJE) RAEOA nian, haktuir benefisiáriu ne’ebé hetan ona apoiu osan Estadu iha RAEOA ba kombatente ka veteranu libertasaun nasionál ema na’in-363 no mártires libertasaun nasionál ema na’in-223.
Jornalista: Abílio Elo Nini
Editór: Rafael Ximenes de A. Belo
